بدھ کی صبح جنوب مغربی دہلی کے پالم علاقے میں ایک رہائشی عمارت میں آگ لگنے سے تین بچوں سمیت نو افراد ہلاک ہو گئے۔ دہلی فائر سروس (DFS) کے اہلکاروں نے مکینوں کو بچایا اور انہیں قریبی اسپتال پہنچایا، جہاں ڈاکٹروں نے تمام چھ افراد کو مردہ قرار دیا۔ متاثرین میں پرویش (35)، کمل (40)، آشو (32) اور 12، 6 اور 5 سال کی تین نابالغ لڑکیاں شامل ہیں، جنہیں منی پال اسپتال لے جایا گیا۔
آگ پرقابوپانے کیلئے30 فائرانجنوں کا استعمال
آئی جی آئی اسپتال میں 38 سال کی ایک خاتون کو مردہ حالت میں لایا گیا جب کہ ایک 40 سال کا مرد اور ایک دو سالہ بچی اس وقت زیرعلاج ہے۔ صفدر جنگ اسپتال میں تقریباً 25 فیصد جھلسنے والے ایک 19 سالہ شخص کو داخل کیا گیا ہے۔ آگ اتنی بھیانک تھی کہ اسے بجھانے کے لیے 30 فائر انجنوں کو جائے وقوعہ پر بلانا پڑا۔ حادثے میں کئی لوگ زخمی بھی ہوئے ہیں جنہیں اسپتال میں بھرتی کرایا گیا ہے۔ ریسکیو ٹیموں نے عمارت سے مجموعی طور پر 10 لوگوں کو بچا لیا ہے۔ تاہم مرنے والوں کی تعداد میں اضافے کا خدشہ ہے۔
دو افراد جان بچانے کیلئےعمارت سے کود پڑے
ڈی ایف ایس کے مطابق، عمارت کے اندر واقع ایک گھر سے صبح 7:00 بجے آگ کی اطلاع دینے والی کال موصول ہوئی۔ آگ پر قابو پانے اور امدادی کاروائیوں میں مدد کے لیے فوری طور پر تیس فائر ٹینڈرز موقع پر روانہ کیے گئے۔ آگ سے بچنے کی کوشش میں دو افراد نے عمارت سے چھلانگ لگا دی اور انہیں اسپتال میں داخل کرایا گیا۔ خبر رساں ایجنسی کے مطابق، دہلی فائر سروسز کے ایک افسر نے پہلے کہا تھا، "رہائشی یونٹ میں آگ لگنے کی اطلاع موصول ہوئی تھی، اور ہمیں خدشہ ہے کہ کچھ لوگ اندر پھنس سکتے ہیں۔"فائر فائٹنگ اور ریسکیو کی کوششوں کے بعد آگ پر کامیابی سے قابو پالیا گیا۔
آگ پر کافی حد تک قابو پالیاگیا
ابتدائی معلومات کے مطابق یہ عمارت ایک تہہ خانے، گراؤنڈ فلور اور چار منزلوں پر مشتمل ہے، اس کے ساتھ چھت پر ایک عارضی ٹین شیڈ بھی ہے۔ ذرائع کے مطابق، تہہ خانے، گراؤنڈ اور پہلی منزل مبینہ طور پر کپڑے اور کاسمیٹکس کو ذخیرہ کرنے کے لیے استعمال کی جا رہی تھی، جب کہ دوسری اور تیسری منزل رہائشی جگہوں کے طور پر کام کرتی تھی۔ بتایا جارہا ہے کہ عمارت میں تقریباً 22 افراد پر مشتمل خاندان رہتا ہے جن میں سے 10 سے 12 افراد گوا گھومنے گئے ہوئے ہیں۔ اس وقت جو گھر میں تھے وہ آگ کی لپیٹ میں آ گئے۔ عمارت میں لگی آگ پر کافی حد تک قابو پالیا گیا ہے لیکن آگ پوری طرح سے نہیں بجھی ہے۔ دھوئیں کا گہرا بادل مسلسل اٹھ رہا ہے۔ فائر فائٹرز عمارت کو ٹھنڈا کرنے کے لیے مسلسل پانی کا چھڑکاؤ کر رہے ہیں۔
وزیراعلیٰ نےعدالتی جانچ کی دی ہدایت
دہلی کی وزیر اعلیٰ ریکھا گپتا نے پالم میں ایک کثیر المنزلہ رہائشی عمارت میں لگنے والی آگ پر تشویش کا اظہار کیا اور کہا کہ مجسٹریل انکوائری کا حکم دے دیا گیا ہے۔"پالم میں ایک کثیر المنزلہ رہائشی عمارت میں آتشزدگی کے بدقسمتی کے واقعے کے بارے میں جان کر انتہائی تکلیف ہوئی،" انہوں نے X پر کہا۔
موصولہ اطلاعات کے مطابق 6 افراد کی ہلاکت کا خدشہ ہے، عمارت کے اندر کچھ لوگ اب بھی پھنسے ہوئے ہیں۔ ضلع انتظامیہ، دہلی فائر سروس ڈیپارٹمنٹ اور دہلی پولیس ریسکیو آپریشن کی قیادت کر رہے ہیں۔ واقعہ کی مجسٹریل انکوائری کا حکم دے دیا گیا ہے۔ سب کی سلامتی کے لیے دعا۔"
ایل جی نے کیا تشویش کا اظہار
دہلی کے لیفٹیننٹ گورنر ترنجیت سنگھ سندھو نے پالم میٹرو کے قریب آگ لگنے کے واقعہ پر تشویش کا اظہار کرتے ہوئے کہا کہ حکام بچاؤ اور آگ بجھانے کی کوششوں پر گہری نظر رکھے ہوئے ہیں جبکہ متاثرہ افراد کو تمام ضروری مدد فراہم کی جا رہی ہے۔ایکس پر ایک پوسٹ میں، انہوں نے کہا، "پالم میٹرو کے قریب ایک رہائشی عمارت میں آتشزدگی کے واقعے سے بہت دکھی ہوں۔میرے خیالات اس المناک نقصان سے متاثر ہونے والوں کے ساتھ ہیں۔ ریسکیو اور آگ بجھانے کے کاموں پر کڑی نظر رکھی جا رہی ہے، تمام ضروری مدد فراہم کی جا رہی ہے۔"
