بہار کے نالندہ ضلع میں منگل کی صبح ایک بڑا سانحہ پیش آ گیا۔ یہاں کے مشہور شیطلا ماتا مندر میں بھگدڑ مچنے سے 8 خواتین کی موت ہو گئی ہے۔جبکہ اس دوران بھگدڑ مچنے سے متعدد افراد زخمی بھی ہوئے ہیں۔ مرنے والوں میں کئی خواتین کا تعلق پٹنہ سے بتایا جاتا ہے۔ ہلاکتوں میں اضافے کا خدشہ ہے۔ یہ واقعہ دیپ نگر پولیس اسٹیشن کے دائرہ اختیار میں واقع ماگرا کے شیتلا مندر میں پیش آیا۔
بتایا جا رہا ہے کہ یہ واقعہ زیادہ بھیڑ اور مناسب انتظامات کی کمی کی وجہ سے پیش آیا۔ حادثے کے بعد راحت اور بچاؤ کا کام شروع کر دیا گیا ہے۔ ابھی تک، انتظامیہ نے اپنی جانوں سے ہاتھ دھونے والے عقیدت مندوں کی تعداد کی سرکاری طور پر تصدیق نہیں کی ہے۔
تاہم، مقامی ذرائع اور میڈیا رپورٹس کے مطابق 8 خواتین کی موت ہو چکی ہے۔ حادثے کی جگہ پر انتظامی افسران پہنچ گئے ہیں۔
حادثہ کیسے پیش آیا؟
شیطلا ماتا مندر میں ہر منگل کو بڑی تعداد میں عقیدت مند جمع ہوتے ہیں۔ آج چیتر ماس کا آخری منگل ہونے کی وجہ سے یہاں کافی ہجوم تھا۔ لوگ قطار میں لگنے کی بجائے جلد از جلد آگے نکل کر درشن کرنے کی کوشش کر رہے تھے، جس سے بھگدڑ جیسی صورتحال پیدا ہو گئی۔
میڈیا رپورٹس کے مطابق، مندر کا اندرونی حصہ کافی چھوٹا ہونے کی وجہ سے لوگ دب گئے اور ان کی سانس رک گئی۔ اب تک دو خواتین کی شناخت ریتا دیوی (50) اور ریکھا (45) کے نام سے ہوئی ہے۔
انتظامیہ کی جانب سے کوئی انتظامات نہیں تھے:
مقامی لوگوں نے میڈیا کو بتایا کہ میلے میں انتظامیہ کی طرف سے کوئی مناسب انتظامات نہیں کیے گئے تھے۔ بھیڑ کو کنٹرول کرنے کے لیے نہ تو مندر انتظامیہ نے اور نہ ہی حکومت نے کوئی اہلکار تعینات کیا تھا۔حادثے کے بعد انتظامیہ نے میلے کو فوری طور پر بند کر دیا ہے۔ زخمیوں کو اسپتال میں داخل کرایا گیا ہے۔ مندر کے انتظامات سے پوچھ گچھ جاری ہے۔ پولیس اور انتظامیہ کی ٹیم موقع پر موجود ہے۔
