اتر پردیش کے غازی آباد میں ایک چونکا دینے والا واقعہ سامنے آیا ہے جہاں عصمت دری کے مقدمہ میں گرفتار ملزم سشیل پرجاپتی کی ضمانت پر رہائی کے بعد اس کا شاندار استقبال کیا گیا۔ جیل سے باہر آتے ہی اس کے حامیوں نے اسے پھولوں کے ہار پہنائے اور کندھوں پر اٹھا لیا، جس کی ویڈیو سوشل میڈیا پر تیزی سے وائرل ہو رہی ہے۔
اطلاعات کے مطابق ایک ایل ایل بی طالبہ نے 7 اگست 2025 کو مراد نگر پولیس اسٹیشن میں سشیل پرجاپتی کے خلاف عصمت دری کی شکایت درج کروائی تھی۔ خاتون نے الزام عائد کیا کہ ملزم اسے اپنی گاڑی میں لے گیا اور کولڈ ڈرنک میں نشہ آور چیز ملا کر پلائی، جس کے بعد اس کے ساتھ زیادتی کی گئی۔
مقدمہ درج ہونے کے بعد سشیل پرجاپتی نے 21 اگست کو عدالت میں خودسپردگی کر دی تھی اور تب سے وہ جیل میں بند تھا۔ عدالت کی جانب سے ضمانت منظور کیے جانے کے بعد اسے 17 مئی کو رہا کیا گیا۔
جیل کے باہر اس کے حامیوں اور دوستوں کی بڑی تعداد پہلے سے موجود تھی۔ جیسے ہی وہ باہر نکلا، حامیوں نے نعروں کے درمیان اس کا استقبال کیا، گلے میں پھولوں کے ہار ڈالے اور کندھوں پر اٹھا کر جلوس کی شکل میں وہاں سے لے گئے۔ ویڈیو میں گاڑیوں کا قافلہ بھی دیکھا جا سکتا ہے۔
سشیل پرجاپتی غازی آباد میں ایک ہندو تنظیم سے وابستہ رہ چکا ہے۔ اس کے علاوہ وہ گزشتہ ڈیڑھ سال سے کسان تنظیم کی سرگرمیوں میں بھی شامل بتایا جا رہا ہے۔
یہ ویڈیو منظر عام پر آنے کے بعد سوشل میڈیا پر شدید ردعمل دیکھنے کو مل رہا ہے۔ کئی افراد نے سنگین الزامات کا سامنا کرنے والے شخص کے اس طرح استقبال پر سوالات اٹھائے ہیں جبکہ بعض حلقوں نے اسے قانون اور سماجی حساسیت کے خلاف قرار دیا ہے۔
اس معاملے پر ردعمل ظاہر کرتے ہوئے علاقے کے ڈی سی پی دیہی سریندر ناتھ تیواری نے کہا کہ پولیس نے وائرل ویڈیو کا نوٹس لے لیا ہے اور پورے واقعے کی تحقیقات جاری ہیں۔ انہوں نے کہا کہ اگر تفتیش کے دوران کوئی ایسا عمل سامنے آیا جس سے امن و امان متاثر ہوتا ہو یا قانونی ضابطوں کی خلاف ورزی ہوئی ہو تو قانون کے مطابق کارروائی کی جائے گی۔
