عالمی سطح پر مقبول سوشل میڈیا پلیٹ فارم فیس بک کی مالک کمپنی میٹا نے صارفین کے لیے ایک بڑی تبدیلی کا اعلان کیا ہے، جس کے تحت فیس بک کا یوزر انٹرفیس (UI) اور فیچرز میں اہم اصلاحات متعارف کرائی جائیں گی۔ کمپنی کا کہنا ہے کہ یہ تبدیلیاں صارفین کے تجربے کو مزید بہتر بنانے اور سوشل نیٹ ورکنگ کو زیادہ محفوظ اور موثر بنانے کے لیے کی جا رہی ہیں۔
میٹا کے چیف ایگزیکٹیومارک زکربرگ نے اعلان کیا کہ فیس بک کے نیوز فیڈ،گروپس اور ویڈیو پلیٹ فارم میں بڑی اپ ڈیٹس کی جائیں گی، جس سے صارفین کو اپنی دلچسپی کی خبریں، ویڈیوز اور پوسٹس زیادہ آسانی سے دیکھنے کا موقع ملے گا۔ اس کے ساتھ ہی کمپنی نے میسینجر ایپ کو بھی فیس بک ایپ میں دوبارہ ضم کرنے کا فیصلہ کیا ہے تاکہ صارفین ایک ہی جگہ چیٹ اور پوسٹس کا لطف لے سکیں۔
مارک زکربرگ کے مطابق نئی اپ ڈیٹس میں AI پر مبنی ریکومینڈیشن فیچر شامل کیا جا رہا ہے، جو صارفین کی پسند اور دلچسپی کے مطابق پوسٹس اور ویڈیوز فیڈ میں پیش کرے گا۔ ساتھ ہی پرائیویسی سیٹنگز کو بھی مزید آسان اور واضح بنایا جا رہا ہے تاکہ صارفین اپنی معلومات پر مکمل کنٹرول رکھ سکیں۔
میٹا کی جانب سے جاری کردہ بیان میں کہا گیا ہے کہ آئندہ چند مہینوں میں یہ تبدیلیاں بتدریج تمام ممالک میں نافذ کی جائیں گی اور صارفین کو نئی سہولتوں کا تجربہ کرنے کا موقع ملے گا۔
ٹیکنالوجی ماہرین کا کہنا ہے کہ فیس بک کا یہ قدم نہ صرف مسابقتی سوشل میڈیا پلیٹ فارمز جیسے ٹک ٹاک اور ایکس (ٹوئٹر) کا مقابلہ کرنے کے لیے اہم ہے بلکہ صارفین کے اعتماد کو بحال کرنے کی ایک کوشش بھی ہے، جو حالیہ برسوں میں پرائیویسی اور ڈیٹا سیکیورٹی کے معاملات پر متاثر ہوا تھا۔
یاد رہے کہ فیس بک دنیا کا سب سے بڑا سوشل میڈیا نیٹ ورک ہے، جس کے ماہانہ صارفین کی تعداد تقریباً 3 ارب سے تجاوز کر چکی ہے۔
