میڈیکل کورسز میں داخلے کے لیے منعقدہ NEET-UG 2025 امتحان کی عارضی جوابی Key نیشنل ٹیسٹنگ ایجنسی (NTA) نے منگل کے روز جاری کر دی ہے۔ وہ تمام طلباء جنہوں نے 4 مئی کو منعقد ہوئے اس قومی سطح کے امتحان میں شرکت کی تھی، وہ اب سرکاری ویب سائٹ [https://neet.nta.nic.in/](https://neet.nta.nic.in/) پر جا کر اپنی جوابی کلید، جوابی شیٹ اور سوالیہ پیپر ڈاؤن لوڈ کر سکتے ہیں۔
NTA نے طلباء کو ہدایت دی ہے کہ اگر وہ کسی سوال کے جواب پر اعتراض کرنا چاہتے ہیں تو وہ آج سے 5 جون رات 11:50 بجے تک آن لائن اعتراضات داخل کر سکتے ہیں۔ ہر سوال پر اعتراض کے لیے 200 روپے فیس مقرر کی گئی ہے، جو آن لائن ادا کی جا سکتی ہے۔ نیشنل ٹیسٹنگ ایجنسی کے مطابق، مضامین کے ماہرین پر مشتمل ایک خصوصی پینل طلباء کے اعتراضات کا باریک بینی سے جائزہ لے گا، جس کے بعد حتمی جوابی کلید جاری کی جائے گی۔
متوقع طور پر جون کے اواخر میں نتائج کا اعلان کیا جائے گا، جس کے بعد NEET-UG 2025 کی کاؤنسلنگ کا شیڈول جاری کیا جائے گا۔ اس سال NEET-UG امتحان میں ملک بھر کے 20.8 لاکھ سے زیادہ طلباء نے شرکت کی تھی۔ یہ امتحان سخت حفاظتی انتظامات کے تحت 5,400 سے زائد مراکز پر منعقد ہوا، جبکہ بیرون ملک 14 مراکز پر بھی طلباء نے امتحان میں حصہ لیا۔
طلباء اور والدین نے جوابی کلید کے اجرا کا خیرمقدم کرتے ہوئے جلد از جلد نتائج جاری کرنے کی اپیل کی ہے، تاکہ کاؤنسلنگ اور داخلے کے عمل میں آسانی ہو۔
