ترنمول کانگریس (ٹی ایم سی) میں مبینہ تقسیم کے معاملے پر لوک سبھا اسپیکر اوم برلا نے پارٹی کے قومی جنرل سیکریٹری ابھیشیک بنرجی کو 19 جون کو ملاقات کے لیے مدعو کیا ہے۔ اس ملاقات میں ابھیشیک بنرجی اپنی پارٹی کا مؤقف پیش کریں گے۔
یہ پیش رفت اس وقت سامنے آئی ہے جب ٹی ایم سی کے 20 باغی ارکان پارلیمنٹ نے نیشنلسٹ سٹیزنز پارٹی آف انڈیا میں انضمام کے بعد خود کو ایک الگ گروپ کے طور پر تسلیم کرنے کا مطالبہ کیا ہے۔ اس معاملے پر فیصلہ کرنے سے قبل لوک سبھا اسپیکر اوم برلا نے دونوں فریقوں کو سننے کا فیصلہ کیا ہے۔
اس سے قبل 10 جون کو ابھیشیک بنرجی نے لوک سبھا اسپیکر کو ایک خط لکھ کر درخواست کی تھی کہ ترنمول کانگریس سے الگ گروپ ہونے کا دعویٰ کرنے والے کسی بھی دھڑے کو کوئی سرکاری شناخت، حیثیت یا پارلیمانی سہولت نہ دی جائے۔
اپنے خط میں انہوں نے مؤقف اختیار کیا تھا کہ ہندوستان کا آئین اور انسدادِ انحراف قانون (اینٹی ڈیفیکشن قانون) کسی موجودہ سیاسی جماعت کے اندر الگ گروپ تشکیل دینے کی اجازت نہیں دیتا۔
اب سیاسی حلقوں کی نظریں 19 جون کی ملاقات پر مرکوز ہیں، جہاں ابھیشیک بنرجی اپنا مؤقف پیش کریں گے، جبکہ اس کے بعد لوک سبھا اسپیکر دونوں فریقوں کے دلائل اور قانونی پہلوؤں کا جائزہ لے کر حتمی فیصلہ کریں گے۔
