e4152346-fb43-4b17-9cdd-2252097cd824305202516439.jpg)
ہندوستانی وزارت خارجہ نے جمعرات کے روز ایک اہم انکشاف کرتے ہوئے بتایا ہے کہ رواں سال جنوری سے اب تک 1100 ہندوستانی شہری امریکہ سے وطن واپس آئے ہیں یا انہیں وہاں کی حکومت کی جانب سے ڈی پورٹ کر دیا گیا ہے۔ وزارت خارجہ کے مطابق، یہ اعداد و شمار غیر قانونی امیگریشن کی موجودہ صورتحال اور دونوں ممالک کے درمیان تعاون کی ایک واضح تصویر پیش کرتے ہیں۔
وزارت خارجہ کے ترجمان رندھیر جیسوال نے میڈیا سے گفتگو کرتے ہوئے بتایا کہ امریکہ میں امیگریشن پالیسی سخت کیے جانے کے بعد غیر قانونی طور پر امریکہ میں داخل ہونے والے ہندوستانی شہریوں کی تعداد میں اضافہ دیکھا گیا۔ تاہم، 2024 کے آغاز سے اب تک 1,100 افراد کو واپس بھیجا جا چکا ہے، جن میں سے 62 فیصد افراد کمرشل پروازوں کے ذریعے وطن لوٹے ہیں، جبکہ باقی افراد کو خصوصی چارٹرڈ پروازوں اور دیگر ذرائع سے واپس لایا گیا۔
رندھیرجیسوال نے مزید کہا کہ غیر قانونی امیگریشن کے مسئلے پر دونوں ممالک کے درمیان قریبی تعاون جاری ہے اور اس سلسلے میں متعدد معاہدے بھی موجود ہیں۔ انہوں نے واضح کیا کہ حکومت ہند غیر قانونی طور پر امریکہ میں مقیم شہریوں کی واپسی کے لیے امریکی حکام کے ساتھ مسلسل رابطے میں ہے تاکہ اس معاملے کو قانونی اور انسانی ہمدردی کی بنیاد پر حل کیا جا سکے۔
اس موقع پر ترجمان نے ایران میں تین لاپتہ ہندوستانی شہریوں کے بارے میں بھی گفتگو کی۔ انہوں نے کہا کہ ایرانی حکام کے ساتھ مسلسل رابطے میں ہیں اور امید ہے کہ جلد ہی ان کی بازیابی کی خبر ملے گی۔ ترجمان کا کہنا تھا کہ حکومت ہندوستان بیرون ملک مقیم شہریوں کے تحفظ اور ان کے مسائل کے حل کے لیے ہر ممکن اقدامات کر رہی ہے۔
امیگریشن پالیسیوں پر امریکی صدر ڈونلڈ ٹرمپ کے سخت فیصلوں سے ہندوستانی طلباء اور ملازمین میں بے چینی پیدا ہو رہی ہے۔ 'میک امریکہ گریٹ اگین، کے نعرے کے تحت غیر ملکیوں پر ان کی پابندیاں ہندوستانیوں کے 'ڈالر کے خواب، کو راکھ میں بدل رہی ہیں۔ 20 جنوری کو اقتدار میں آنے کے بعد سے، ہر مسئلے پر ان کے فیصلے ۔ غیرقانونی امیگریشن، H1B، گرین کارڈ، پیدائش کے لحاظ سے شہریت کی منسوخی، F1، OPT - ہندوستانیوں کی راتوں کی نیندیں اڑا رہے ہیں۔
یہ صورتحال ایک بار پھر اس امر کی یاددہانی کراتی ہے کہ غیر قانونی امیگریشن نہ صرف متعلقہ افراد بلکہ ان کے خاندانوں اور ملک کی ساکھ کے لیے بھی مشکلات کا باعث بنتی ہے۔ حکومت نے شہریوں سے اپیل کی ہے کہ وہ قانونی اور محفوظ طریقوں سے بیرون ملک سفر کریں اور غیر قانونی راستوں سے اجتناب کریں۔
