محکمہ موسمیات کے مطابق ویسٹرن ڈسٹربنس کے اثر سے شمال مغربی ہندوستان کے پہاڑی اور میدانی علاقوں میں موسم نے اچانک کروٹ لے لی ہے۔ پیر کے روز کئی علاقوں میں گرج چمک کے ساتھ ہلکی سے موسلادھار بارش ہوئی، جبکہ بعض مقامات پر گرد و غبار اور ژالہ باری کے باعث درجہ حرارت میں نمایاں کمی ریکارڈ کی گئی۔
محکمہ موسمیات نے خبردار کیا ہے کہ آج شمال مغربی، وسطی اور مشرقی ہندوستان کے کئی حصوں میں گرج چمک کے ساتھ وسیع پیمانے پر بارش، 40 سے 60 کلومیٹر فی گھنٹہ کی رفتار سے تیز ہوائیں اور ژالہ باری کا امکان ہے۔ گزشتہ روز اتر پردیش، پنجاب اور ہریانہ میں شدید بارش اور ژالہ باری دیکھی گئی، جبکہ مغربی اتر پردیش کے بعض علاقوں میں 11 سے 20 سینٹی میٹر تک بارش ریکارڈ کی گئی۔ کچھ مقامات پر ہوا کی رفتار 60 سے 80 کلومیٹر فی گھنٹہ تک پہنچ گئی۔
اسی طرح جھارکھنڈ، اتراکھنڈ، مدھیہ پردیش اور تلنگانہ کے مختلف علاقوں میں بھی ژالہ باری کی اطلاعات ملی ہیں، جس سے فصلوں اور روزمرہ زندگی پر اثر پڑنے کا خدشہ ہے۔
ادھر، ہماچل پردیش کے کئی علاقوں میں خراب موسم آئندہ دو دنوں تک برقرار رہنے کی پیشگوئی کی گئی ہے۔ محکمہ موسمیات نے 5 اور 6 مئی کے لیے ریاست کے مختلف اضلاع میں یلو الرٹ جاری کیا ہے۔ شملہ میں واقع موسمیاتی مرکز کے مطابق بلاس پور، اونا، کانگڑا، کلّو اور منڈی میں بعض مقامات پر موسلادھار بارش اور گرج چمک کی توقع ہے۔
محکمہ کے مطابق 6 سے 9 مئی کے دوران میدانی علاقوں میں موسم عام طور پر صاف اور خشک رہ سکتا ہے، تاہم درمیانی اونچائی والے علاقوں میں کہیں کہیں ہلکی بارش جاری رہنے کا امکان ہے۔ ماہرین کا کہنا ہے کہ جیسے ہی ویسٹرن ڈسٹربنس کمزور ہوگا، دھوپ کی شدت بڑھنے سے درجہ حرارت میں 2 سے 4 ڈگری سیلسیس تک اضافہ ہو سکتا ہے۔
موسمیاتی ماہرین نے شہریوں کو احتیاط برتنے، غیر ضروری سفر سے گریز کرنے اور تیز ہواؤں و ژالہ باری کے دوران محفوظ مقامات پر رہنے کی ہدایت دی ہے، تاکہ کسی بھی ممکنہ نقصان سے بچا جا سکے۔
