کولکتہ: بین الاقوامی یوگا ڈے آج دنیا بھر کے تقریباً 2500 مقامات پر جوش و خروش کے ساتھ منایا جا رہا ہے۔ 12ویں بین الاقوامی یوگا ڈے کا تھیم صحت مند عمر رسیدگی کے لیے یوگا" رکھا گیا ہے، جس کا مقصد ہر عمر کے افراد میں یوگا کی اہمیت اور اس کے فوائد کو اجاگر کرنا ہے۔
اس موقع کی مرکزی قومی تقریب مغربی بنگال کے تاریخی ریڈ روڈ، کولکتہ میں منعقد ہوئی، جس کی قیادت وزیر اعظم نریندر مودی نے کی۔ اس عظیم الشان یوگا سیشن میں ہزاروں عام شہریوں نے بھی شرکت کی اور اجتماعی طور پر یوگا کر کے صحت اور تندرستی کا پیغام دیا۔
تقریب سے خطاب کرتے ہوئے وزیر اعظم مودی نے کہا کہ ہمارا مقصد یہ ہونا چاہیے کہ 50 سال کی عمر میں بھی انسان خود کو 30 سال کی عمر جتنا توانا محسوس کرے۔ انہوں نے کہا کہ یوگا ڈے کے موقع پر بنگال کی مقدس سرزمین پر موجود ہونا ان کے لیے ایک خاص تجربہ ہے۔
وزیر اعظم نے سوامی وویکانند کو یاد کرتے ہوئے کہا کہ یہ وہ سرزمین ہے جہاں سے ان کے خیالات نے یوگا اور بھارتی روحانیت کے پیغام کو دنیا بھر میں پہنچانے میں اہم کردار ادا کیا۔ انہوں نے کہا کہ آج اسی مقام پر ہزاروں لوگوں کے ساتھ اجتماعی یوگا کا تجربہ ایک منفرد روحانی احساس فراہم کر رہا ہے۔
پی ایم مودی نے مزید کہا کہ یوگا صرف جسمانی ورزش یا آسنوں تک محدود نہیں، بلکہ یہ انسانوں کے درمیان اتحاد، توازن اور ہم آہنگی کا پیغام دیتا ہے۔ ان کے مطابق یوگا نہ صرف فرد کی بہتر زندگی کے لیے ضروری ہے بلکہ ایک صحت مند اور پرامن دنیا کی تعمیر میں بھی اہم کردار ادا کرتا ہے۔
انہوں نے بتایا کہ "یوگا 365" مہم کو فروغ دینے کے لیے حکومت نے 100 دنوں پر مشتمل آن لائن یوگا کلاسز کا سلسلہ بھی شروع کیا ہے، تاکہ لوگ سال بھر اپنی روزمرہ زندگی میں یوگا کو شامل کر سکیں۔
