تلنگانہ پولیس کو انسدادِ ماؤ نواز کاروائیوں میں ایک بڑی کامیابی حاصل ہوئی ہے، جہاں سی پی آئی (ماؤسٹ) کے 42 کیڈرز نے ہتھیار ڈال دیے۔ ان میں پیپلز لبریشن گوریلا آرمی (PLGA) کے اہم ارکان بھی شامل ہیں۔ ہتھیار ڈالنے والوں میں بیٹالین کمانڈر سوڈی ملا عرف کیشال بھی شامل ہے، جو تنظیم کا ایک اہم رہنما مانا جاتا تھا۔پولیس کے مطابق، ان شدت پسندوں نے جمعہ کے روز ڈائریکٹر جنرل آف پولیس (ڈی جی پی) بی شیودھر ریڈی کے سامنے خودسپردگی کی۔ اس موقع پر انہوں نے 36 آتشیں اسلحہ، 1007 زندہ کارتوس، دو دیسی گرینیڈز اور 800 گرام سونا (آٹھ بسکٹ) بھی حوالے کیے۔
حکام نے بتایا کہ ہتھیار ڈالنے والوں میں 21 ارکان PLGA، 11 تلنگانہ اسٹیٹ کمیٹی (TSC) اور 10 دندکارنیا اسپیشل زونل کمیٹی (DKSZC) سے تعلق رکھتے ہیں۔ ان میں سے تقریباً تمام افراد کا تعلق چھتیس گڑھ سے ہے، جبکہ صرف ایک رکن تلنگانہ کا مقامی ہے۔اہم ہتھیار ڈالنے والوں میں سوڈی ملا عرف کیشال عرف نکھیل، چاپا نارائن عرف گجیندر عرف مدھو، اور کدتی سنو عرف منتھو جیسے سینئر کیڈرز شامل ہیں، جو مختلف اضلاع میں سرگرم تھے۔
ڈی جی پی شیودھر ریڈی نے کہا کہ ان خودسپردگیوں کے بعد سی پی آئی (ماؤسٹ) کے تین اہم “ہتھیاروں” میں سے سب سے اہم، یعنی PLGA کو مکمل طور پر غیر مؤثر بنا دیا گیا ہے۔ انہوں نے دعویٰ کیا کہ تلنگانہ اسٹیٹ کمیٹی کے تمام رہنماؤں کی خودسپردگی کے بعد اب یہ تنظیم ریاست میں مکمل طور پر ختم ہو چکی ہے۔انہوں نے مزید اعلان کیا کہ تلنگانہ اب ماؤ نوازوں کی مسلح سرگرمیوں سے مکمل طور پر پاک ہو چکا ہے۔پولیس کے مطابق، خودسپردگی کے دوران جمع کرائے گئے ہتھیاروں میں پانچ اے کے-47 رائفلیں، چار ایس ایل آر، تین انساس رائفلیں، چھ .303 رائفلیں، ایک اسٹین گن، اور دیگر اسلحہ شامل ہے۔
تلنگانہ حکومت کی بازآبادکاری پالیسی کے تحت، مختلف عہدوں کے مطابق مالی امداد دی جائے گی، جس میں اسٹیٹ کمیٹی ممبران کو 20 لاکھ روپے تک دیے جائیں گے۔ اس کے علاوہ وزارتِ داخلہ کے رہنما اصولوں کے تحت ہتھیار جمع کرانے پر مجموعی طور پر 1.93 کروڑ روپے کا انعام بھی دیا جائے گا۔فی الحال تلنگانہ سے تعلق رکھنے والے ایک کیڈر کو 4 لاکھ روپے ادا کیے جا چکے ہیں، جبکہ دیگر 41 افراد کو عبوری امداد کے طور پر 25 ہزار روپے فی کس دیے گئے ہیں۔ بقیہ رقم دستاویزی کارروائی مکمل ہونے کے بعد فراہم کی جائے گی۔
ڈی جی پی نے اسپیشل انٹیلی جنس برانچ کی کارکردگی کو سراہتے ہوئے کہا کہ ان کی مسلسل اور منظم کوششوں کے باعث یہ بڑی کامیابی ممکن ہوئی ہے۔ انہوں نے بتایا کہ 2024 سے اب تک 761 ماؤ نواز کیڈرز نے ہتھیار ڈالے ہیں اور 302 ہتھیار برآمد کیے جا چکے ہیں، جو اس تنظیم کے زوال کی واضح نشانی ہے۔آخر میں پولیس سربراہ نے باقی ماندہ پانچ سرگرم ماؤ نواز کیڈرز سے اپیل کی کہ وہ بھی ہتھیار ڈال کر قومی دھارے میں شامل ہو جائیں اور حکومتی مراعات سے فائدہ اٹھائیں۔
