6858d84c-0f0a-4281-8a5c-499c7d940bed307202612452.jpg)
بھارت کے تجربہ کار بلے باز اجنکیا رہانے نے بین الاقوامی کرکٹ سے ریٹائرمنٹ کا اعلان کر دیا ہے۔ 38 سالہ رہانے نے اپنے سوشل میڈیا اکاؤنٹ پر ایک جذباتی ویڈیو پیغام جاری کرتے ہوئے فینزکا شکریہ ادا کیا اور اپنے بین الاقوامی کیریئر کو الوداع کہہ دیا۔
اپنے پیغام میں رہانے نے کہا کہ زندگی میں ہر چیز کا ایک آغاز اور ایک اختتام ہوتا ہے، اور جب صحیح وقت آئے تو اس کا احترام کرتے ہوئے آگے بڑھ جانا چاہیے۔ انہوں نے کہا کہ انہوں نے ہمیشہ اپنی بیٹنگ میں درست وقت کو اہمیت دی اور اب انہیں محسوس ہوتا ہے کہ بین الاقوامی کرکٹ اور اس کے تمام فارمیٹس سے ریٹائرمنٹ لینے کا یہی صحیح وقت ہے۔ رہانے نے یہ بھی کہا کہ ڈومبیولی کے ایک نوجوان کھلاڑی سے لے کر بھارتی ٹیم تک کے سفر میں انہوں نے اس کھیل کو اپنا سب کچھ دیا، وہ آئندہ بھی کسی نہ کسی شکل میں کرکٹ سے جڑے رہنا چاہتے ہیں۔
نمبروں میں رہانے کا کیریئر
اجنکیا رہانے کو خاص طور پر بارڈر-گواسکر ٹرافی 2020-21 میں آسٹریلیا کے خلاف بھارت کی تاریخی فتح کے اہم ہیروز میں شمار کیا جاتا ہے، جہاں ان کی قیادت اور شاندار کارکردگی نے بھارتی کرکٹ کی تاریخ میں اہم مقام حاصل کیا۔ اعداد و شمار کے لحاظ سے رہانے نے اپنے بین الاقوامی کیریئر میں 85 ٹیسٹ، 90 ون ڈے اور 20 ٹی ٹوئنٹی میچز کھیلے۔ ان 195 بین الاقوامی میچوں میں انہوں نے مجموعی طور پر 8,414 رنز بنائے، جن میں 5,077 رنز ٹیسٹ کرکٹ میں آئے۔ بین الاقوامی کرکٹ کے علاوہ رہانے نے آئی پی ایل میں بھی چھ مختلف فرنچائزز کی نمائندگی کی اور 212 میچز کھیلے۔
رہانے نے 2013 میں آسٹریلیا کے خلاف سیریز کے دوران بھارتی ٹیسٹ ٹیم میں جگہ بنائی اور بعد میں ٹیم کے اہم مڈل آرڈر بلے باز بن گئے۔ انہوں نے خاص طور پر بیرونِ ملک میں شاندار کارکردگی دکھائی اور اپنے 12 ٹیسٹ سنچریوں میں سے 8 سنچریاں بیرونِ ملک اسکور کیں، جس کی وجہ سے انہیں بھارت کے قابلِ اعتماد ٹیسٹ بلے بازوں میں شمار کیا جاتا ہے۔
