بہار کے ضلع پورنیا میں ایک دل دہلا دینے والا واقعہ پیش آیا ہے۔ ضلع میں ایک ہی خاندان کے 5 افراد کو زندہ جلا دیا گیا ہے۔ مہلوکین میں تین خواتین اور دو مرد شامل ہیں۔ پولیس نےاس معاملے میں ایک تانترک سمیت دو لوگوں کو حراست میں لے لیا ہے۔ یہ واقعہ پورنیہ کے مفصل تھانہ کے ٹیٹگاما گاؤں میں پیش آیا۔
کہا جا رہا ہے کہ چڑیل ہونے کے الزام میں پہلے پانچ لوگوں کو پیٹ پیٹ کر ہلاک کر دیا گیا۔ اس کے بعد گھر کو آگ لگا دی گئی۔ اس آگ میں پانچ افراد کی موت ہو گئی۔ مہلوکین کی شناخت بابولال اوراں، سیتا دیوی، منجیت اوراں، رانیہ دیوی، اور تپتو کےطورپر ہوئی ہے۔ راجی گنج پنچایت میں اس واقعہ کے بعد دہشت کا ماحول پھیل گیا ہے۔ انتظامیہ بھی صدمے میں ہے۔
بتایا جا رہا ہے کہ اس واقعہ میں خاندان کا ایک فرد کسی طرح اپنی جان بچا نے میں کامیاب ہوگیا۔ اور رشتہ داروں کے گھر پہنچ کر گھر والوں کو معاملے کی اطلاع دی۔ اس کے بعد گھر والوں نے انتظامیہ سے رابطہ کیا اور سب کچھ بتایا۔ اطلاع ملتے ہی پولیس موقع پر پہنچ گئی۔ لاشیں جلی ہوئی حالت میں نکالی گئیں۔
حال ہی میں ٹیٹگاما گاؤں میں کچھ لوگوں کی موت ہوئی تھی۔ کئی بیمار پڑ گئے۔اس دوران گاؤں والوں نے شبہ ظاہر کیا کہ ایک خاندان کی موت جادو ٹونے کی وجہ سے ہوئی ہے۔ جس کے نتیجے میں خاندان کے پانچ افراد کو بے دردی سے مارا پیٹا گیا۔
اعلیٰ حکام موقع پر پہنچ گئے۔ دو کو گرفتار کر لیا گیا ہے۔ اس کے علاوہ کئی لوگوں کو ملزم بنایا گیا ہے۔ ڈاگ سکواڈ اور ایف ایس ایل کی ٹیم موقع پر پہنچ گئی ہے اور ہر پہلو سے تفتیش کر رہی ہے۔ سویٹی سہراوت ایس پی پورنیہ نے کہا کہ تتگاما گاؤں میں اطلاع ملی تھی کہ اوراون ذات کے ایک ہی خاندان کے پانچ افراد کو مارا پیٹا گیا اور پھر جلا دیا گیا اور ان کی لاشوں کو چھپا دیا گیا۔ خاندان کا ایک لڑکا جس کی عمر 16 سال ہے، کسی طرح جان بچا کر اپنے ماموں کے گھر پہنچا اور گھر والوں کو واقعہ کی اطلاع دی۔ ابتدائی طور پر یہ واقعہ گاؤں میں بھتہ خوری کے تنازع کی وجہ سے سامنے آیا ہے۔
