نیٹ پیپر لیک اور امتحانی نظام میں مبینہ بے ضابطگیوں کے خلاف جنتر منتر پر جاری طلبہ کے احتجاج میں آج مزید شدت آنے کا امکان ظاہر کیا جا رہا ہے۔ اسی پیشِ نظر دہلی پولیس نے احتجاجی مقام اور اس کے اطراف سکیورٹی کے غیر معمولی انتظامات کیے ہیں۔ پولیس نے پارلیمنٹ اسٹریٹ اور جے سنگھ مارگ پر اضافی بیریکیڈز نصب کر دیے ہیں، جبکہ کئی مقامات پر لوہے کی سلاخوں اور ویلڈنگ کے ذریعے رکاوٹوں کو مستقل طور پر زمین میں نصب کیا گیا ہے تاکہ مظاہرین کو جنتر منتر کے دائرے تک محدود رکھا جا سکے۔
یہ سخت حفاظتی اقدامات گزشتہ دنوں "پارلیمنٹ چلو مارچ" کے دوران پیش آنے والے تصادم اور کشیدہ صورتحال کے بعد کیے گئے ہیں۔ پولیس کا کہنا ہے کہ ان اقدامات کا مقصد امن و امان برقرار رکھنا اور کسی بھی ناخوشگوار واقعے سے بچنا ہے۔
دوسری جانب، کاکروچ جنتا پارٹی اور احتجاج میں شریک طلبہ نے واضح کیا ہے کہ ان کا بنیادی مطالبہ مرکزی وزیر تعلیم دھرمیندر پردھان کا استعفیٰ ہے۔ مظاہرین کے مطابق حکومت نے ان کے دو مطالبات پر مثبت اشارے دیے ہیں، تاہم وزیر تعلیم کے استعفے کے معاملے پر اب تک کوئی حتمی فیصلہ سامنے نہیں آیا۔
طلبہ رہنماؤں کا کہنا ہے کہ حکومت کو آج تک کا وقت دیا گیا ہے اور انہیں امید ہے کہ اس معاملے پر کوئی واضح اعلان سامنے آئے گا۔ ان کے مطابق آج کا دن احتجاجی تحریک کے لیے انتہائی اہم ثابت ہو سکتا ہے۔
وہیں دوسری طرف نیٹ پیپر لیک تنازعے کے بعد نیشنل ٹیسٹنگ ایجنسی نے بڑی کارروائی کرتے ہوئے 47 افسران کو برطرف کر دیا ہے۔ ذرائع کے مطابق بعض دیگر افسران کے خلاف قانونی اور فوجداری کارروائی کی تیاری بھی جاری ہے۔ یہ فیصلہ ایسے وقت میں سامنے آیا ہے جب ایک روز قبل اعلیٰ تعلیم کے سیکریٹری ونیت جوشی کو ان کے عہدے سے ہٹا دیا گیا تھا۔
ایک سینئر سرکاری عہدیدار نے بتایا کہ این ٹی اے کے نظام میں وسیع پیمانے پر اصلاحات کی جا رہی ہیں تاکہ مستقبل میں امتحانات کے انعقاد کو مزید شفاف اور مؤثر بنایا جا سکے۔ ان کے مطابق ابتدائی مرحلے میں 47 افسران کو برطرف کیا گیا ہے، جبکہ بعض ذمہ دار افراد کے خلاف قانونی کارروائی بھی شروع کی جائے گی۔ حکام کا کہنا ہے کہ حکومت امتحانی نظام میں عوام کا اعتماد بحال کرنے کے لیے مزید اصلاحی اقدامات پر بھی کام کر رہی ہے، تاکہ مستقبل میں پیپر لیک جیسے واقعات کی روک تھام یقینی بنائی جا سکے۔
