ملک میں سونے کی قیمتوں میں غیر معمولی اضافہ دیکھنے میں آیا ہے، جہاں جمعہ کے روز ملٹی کموڈیٹی ایکسچینج (MCX) پر 10 گرام سونے کی قیمت پہلی بار ایک لاکھ روپے کی حد پار کر گئی۔ مشرقِ وسطیٰ میں بڑھتی ہوئی کشیدگی اور جغرافیائی سیاسی تناؤ نے سرمایہ کاروں کو محفوظ سرمایہ کاری کی طرف راغب کیا، جس کا براہِ راست فائدہ سونے اور چاندی جیسی قیمتی دھاتوں کو ہوا۔
جمعہ کی صبح سونے کی قیمت 1,108 روپے یعنی 1.12 فیصد اضافے کے ساتھ 99,500 روپے فی 10 گرام پر کھلی، جبکہ گزشتہ بند قیمت 98,392 روپے تھی۔ اس کے کچھ ہی دیر بعد سونے کی قیمت 1,00,403 روپے تک جا پہنچی، یوں تاریخ میں پہلی بار 1 لاکھ روپے کی حد عبور کر لی۔ دوپہر 12:44 بجے سونا 99,673 روپے فی 10 گرام کی سطح پر 1.30 فیصد اضافے کے ساتھ ٹریڈ ہو رہا تھا۔
ادھر، انڈین بلیئن اینڈ جیولرز ایسوسی ایشن (IBJA) کے مطابق، 22 قیراط سونا 9,679 روپے فی گرام اور 24 قیراط خالص سونا 9,917 روپے فی گرام کی سطح پر پہنچ گیا۔
چاندی کی قیمتوں میں بھی اضافہ دیکھنے میں آیا۔ MCX پر چاندی 565 روپے یا 0.53 فیصد اضافے کے ساتھ 1,06,450 روپے فی کلو پر کھلی اور 1,06,799 روپے کی بلند ترین سطح کو چھوتے ہوئے دوپہر 12:45 بجے 1,06,328 روپے فی کلو کی سطح پر 0.42 فیصد اضافے کے ساتھ ٹریڈ کر رہی تھی۔
عالمی منڈی میں بھی سونے کی قیمتوں میں زبردست اضافہ ہوا، جہاں اسپاٹ گولڈ 1.3 فیصد اضافے کے ساتھ 3,428.28 ڈالر فی اونس تک جا پہنچا، جو 7 مئی کے بعد سب سے بلند سطح ہے۔ امریکی گولڈ فیوچرز بھی 1.4 فیصد اضافے کے ساتھ 3,449.60 ڈالر فی اونس پر پہنچ گئے۔ عالمی منڈی میں سونا رواں ہفتے اب تک 3.5 فیصد کا اضافہ ریکارڈ کرا چکا ہے۔
یہ اضافہ مشرقِ وسطیٰ میں اسرائیل اور ایران کے درمیان بڑھتی ہوئی کشیدگی کے پس منظر میں ہوا ہے۔ اطلاعات کے مطابق اسرائیل نے ایران کے جوہری اور فوجی تنصیبات پر فضائی حملے کیے ہیں، جس کے باعث خطے میں مزید تصادم کا خدشہ بڑھ گیا ہے۔ ایسے حالات میں سرمایہ کار ہمیشہ سونے کو محفوظ سرمایہ کاری سمجھتے ہیں۔
کاما جیولری کے مینیجنگ ڈائریکٹر کولن شاہ نے اس موقع پر کہا کہ "موجودہ جغرافیائی سیاسی حالات اور روپے کی قدر میں گراوٹ کے پیشِ نظر سونے کی قیمت کا تاریخی سطح پر پہنچنا متوقع تھا۔ اگرچہ قلیل مدتی بنیاد پر سونے کی قیمتوں کو مزاحمت کا سامنا ہو سکتا ہے، تاہم آئندہ دنوں میں MCX پر سونا 1,00,200 سے 1,00,500 روپے فی 10 گرام کے درمیان رہنے کا امکان ہے، جس کا انحصار عالمی سیاسی و معاشی حالات پر ہو گا۔"
سرمایہ کاری کے ماہرین کے مطابق، اگر خطے میں کشیدگی مزید بڑھی تو سونے کی قیمتیں مزید نئی بلندیوں کو چھو سکتی ہیں، جبکہ مقامی صارفین کے لیے شادی سیزن میں سونا خریدنا مزید مہنگا ہو جائے گا۔
