مدھیہ پردیش کے دھار ضلع میں بدھ کی رات ایک دل دہلا دینے والا سڑک حادثہ پیش آیا ہے، جس میں مزدوروں سے بھری ایک پک اپ گاڑی بے قابو ہو کر پلٹ گئی۔ حادثے میں اب تک 6 بچوں سمیت 16 افراد کی موت ہو چکی ہے۔
حادثہ تیرلا تھانہ علاقے میں اندور-احمد آباد نیشنل ہائی وے پر واقع چکلیا پھاٹہ کے قریب پیش آیا۔ حادثے کے وقت پک اپ گاڑی کی رفتار تقریباً 100 کلومیٹر فی گھنٹہ بتائی جا رہی ہے۔ حادثے میں 15 سے زائد افراد شدید زخمی ہیں۔
ٹائر پھٹنے کے بعد ڈیوائیڈر سے ٹکرائی پک اپ:
پولیس نے بتایا کہ پک اپ گاڑی 46 مزدوروں کو لے کر دھار سے مانگود آ رہی تھی۔ اچانک اس کا ٹائر پھٹ گیا اور گاڑی بے قابو ہو کر ڈیوائیڈر سے ٹکرا گئی اور 3 سے 4 بار پلٹی۔ اس کے بعد وہ ہائی وے کی دوسری طرف چلی گئی، جہاں مانگود سے دھار آ رہی ایک سکورپیو گاڑی سے بھی ٹکرا گئی اور پلٹ گئی۔حادثے کے بعد چیخیں گونج اٹھیں اور تقریباً 5 افراد نے موقع پر ہی دم توڑ دیا۔ مرنے والوں میں 8 خواتین بھی شامل ہیں۔
رفتار بنی قاتل، سکورپیو کے بھی پرخچے اڑ گئے:
پولیس کا کہنا ہے کہ حادثے کے وقت پک اپ گاڑی کی رفتار بہت تیز تھی، جو تقریباً 100 کلومیٹر فی گھنٹہ بتائی جا رہی ہے۔ پولیس کے مطابق، ٹائر پھٹنے کے بعد ڈرائیور گاڑی کو سنبھال نہ سکا اور گاڑی بے قابو ہو کر پلٹ گئی۔ جس سکورپیو سے پک اپ ٹکرائی، اس کے بھی پرخچے اڑ گئے۔ وہ سڑک کی دوسری طرف سے آ رہی تھی اور اس میں بھی مسافر سوار تھے۔
وزیراعظم اور وزیراعلیٰ نے معاوضے کا اعلان کیا:
وزیراعظم نریندر مودی نے حادثے پر افسوس کا اظہار کرتے ہوئے مرنے والوں کے اہلیان کو 2-2 لاکھ روپے اور زخمیوں کو 50-50 ہزار روپے کی امداد دینے کا اعلان کیا ہے۔
مدھیہ پردیش کے وزیراعلیٰ موہن یادو نے حادثے کو دل دہلا دینے والا قرار دیتے ہوئے مرنے والوں کے اہلیان کو 4-4 لاکھ روپے، شدید زخمیوں کو 1-1 لاکھ روپے اور دیگر زخمیوں کو 50-50 ہزار روپے کی امداد دینے کے ہدایات جاری کی ہیں۔ تمام زخمیوں کا علاج مفت کرنے کا حکم بھی دیا گیا ہے۔
