فٹبال کی دنیا کے عظیم ترین کھلاڑیوں میں شمار ہونے والے لیونل میسی نے ایک بار پھر ثابت کر دیا کہ عمر صرف ایک عدد ہے۔ فیفا ورلڈ کپ 2026 کے گروپ جے کے افتتاحی میچ میں دفاعی چیمپئن ارجنٹینا نے الجزائر کو 3-0 سے شکست دی، جہاں میسی نے شاندار ہیٹ ٹرک کرکے نہ صرف اپنی ٹیم کو فتح دلائی بلکہ کئی تاریخی ریکارڈ بھی اپنے نام کر لیے۔38 سالہ میسی نے ورلڈ کپ میں اپنی چھٹی شرکت کے ساتھ میدان میں قدم رکھا، جو خود ایک عالمی ریکارڈ ہے۔ الجزائر کے خلاف میچ میں ان کی شاندار کارکردگی نے انہیں فٹبال کی تاریخ میں مزید بلند مقام پر پہنچا دیا۔
ورلڈ کپ کے سب سے زیادہ گول کا ریکارڈ برابر
میسی نے الجزائر کے خلاف تین گول کرکے فیفا ورلڈ کپ میں اپنے گولز کی تعداد 16 تک پہنچا دی، جس کے ساتھ انہوں نے جرمنی کے لیجنڈ فٹبالر میروسلاف کلوزے کے عالمی ریکارڈ کی برابری کر لی۔اس سے قبل برازیل کے رونالڈو کے 15 گول تھے، لیکن میسی اب ورلڈ کپ تاریخ میں سب سے زیادہ گول کرنے والے جنوبی امریکی کھلاڑی بھی بن گئے ہیں۔میسی میچ کے آغاز میں کلوزے کے ریکارڈ سے تین گول پیچھے تھے، لیکن صرف 76 منٹ کے کھیل میں انہوں نے یہ فاصلہ ختم کر دیا۔
38 سال کی عمر میں نیا ریکارڈ
ارجنٹینا کے کپتان نے اپنی ہیٹ ٹرک کے ساتھ ایک اور ریکارڈ قائم کیا۔ 38 سال اور 357 دن کی عمر میں میسی ورلڈ کپ کی تاریخ میں ہیٹ ٹرک کرنے والے سب سے معمر کھلاڑی بن گئے۔انہوں نے پرتگال کے کرسٹیانو رونالڈو کا ریکارڈ توڑا، جنہوں نے 2018 کے ورلڈ کپ میں 33 سال اور 130 دن کی عمر میں اسپین کے خلاف ہیٹ ٹرک کی تھی۔
ارجنٹینا کے لیے 200 میچ، 117 گول
الجزائر کے خلاف میچ میسی کے لیے ارجنٹینا کی جانب سے 200 واں انٹرنیشنل میچ بھی تھا۔ قومی ٹیم کے لیے ان کے اعداد و شمار حیران کن ہیں
200 میچز
117 گولز
61 اسسٹس
4 بڑے انٹرنیشنل ٹائٹلز
میسی نے ارجنٹینا کو 2021 اور 2024 کوپا امریکہ، 2022 فائنالیسیما اور 2022 ورلڈ کپ جتوانے میں اہم کردار ادا کیا۔
ورلڈ کپ کے چھ ایڈیشن کھیلنے والے پہلے کھلاڑی
میسی تاریخ کے پہلے فٹبالر بن گئے ہیں جنہوں نے فیفا ورلڈ کپ کے چھ ایڈیشنز میں شرکت کی ہے۔
اس سے قبل یہ ریکارڈ میکسیکو کے انتونیو کارباخال، جرمنی کے لوثار میتھاؤس، میکسیکو کے رافا مارکیز اور آندریس گارڈادو کے پاس مشترکہ طور پر تھا۔ کرسٹیانو رونالڈو بھی ورلڈ کپ 2026 میں شرکت کے بعد اس ریکارڈ میں شامل ہو سکتے ہیں۔
ورلڈ کپ میں بے مثال ریکارڈز
میسی کے نام کئی ایسے ریکارڈ ہیں جو انہیں منفرد بناتے ہیں
ورلڈ کپ میں سب سے زیادہ میچز کھیلنے کا ریکارڈ، 26 مقابلے
کپتان کی حیثیت سے سب سے زیادہ ورلڈ کپ میچز، 20 مقابلے
ورلڈ کپ میں پہلے گول سے آخری گول تک سب سے طویل وقفہ، 20 سال
ایک ہی ورلڈ کپ ایڈیشن میں گروپ مرحلے سے فائنل تک ہر مرحلے میں گول کرنے والے واحد کھلاڑی
ورلڈ کپ گولڈن بال دو بار جیتنے والے واحد کھلاڑی
فیفا صدر نے بھی کی تعریف
فیفا کے صدر جانی انفینٹینو نے میسی کو خراج تحسین پیش کرتے ہوئے کہا کہ کلوزے کے ریکارڈ کی برابری ان کی "لازوال صلاحیت" کا ثبوت ہے۔
انفینٹینو نے کہا کہ میسی نے شاندار انداز میں ورلڈ کپ کا آغاز کیا اور دنیا بھر کے کروڑوں شائقین کو خوشی دی۔
مبابے اور ہالینڈ بھی خبروں میں
ورلڈ کپ 2026 میں صرف میسی ہی نہیں بلکہ فرانس کے کیلین مباپے اور ناروے کے ایرلنگ ہالینڈ نے بھی نئے سنگ میل عبور کیے۔
مبابے نے سینیگال کے خلاف دو گول کرکے فرانس کے سب سے زیادہ گول کرنے والے کھلاڑی کا اعزاز حاصل کیا، جبکہ ہالینڈ نے ورلڈ کپ ڈیبیو میں عراق کے خلاف دو گول کیے۔
میسی کا سفر ابھی جاری ہے
میسی نے فٹبال کو صرف گولز اور ٹرافیوں سے نہیں بلکہ یادگار لمحوں سے بھی مالا مال کیا ہے۔ 2022 میں ارجنٹینا کو ورلڈ کپ جتوانے کے بعد 2026 میں ان کی ریکارڈ ساز مہم نے ایک بار پھر ثابت کر دیا ہے کہ میسی کا نام فٹبال کی تاریخ میں ہمیشہ سنہری حروف سے لکھا جائے گا۔
اب میسی کے پاس موقع ہے کہ وہ آسٹریا کے خلاف اگلے میچ میں کلوزے کا ریکارڈ توڑ کر ورلڈ کپ تاریخ کے سب سے بڑے گول اسکورر بن جائیں۔
