نئی دہلی: سوشل میڈیا پر تیزی سے وائرل ہونے والی وزیراعظم نریندر مودی کی ایک مبینہ سرمایہ کاری ویڈیو کو حکومت ہند کے پی آئی بی فیکٹ چیک یونٹ نے جعلی قرار دیا ہے۔ وائرل ویڈیو میں "کوانٹم AI" نامی ایک سرمایہ کاری پلیٹ فارم کی تشہیر کرتے ہوئے غیر معمولی منافع کا دعویٰ کیا جا رہا تھا۔
ویڈیو میں دعویٰ کیا گیا تھا کہ صرف 21,000 سے 22,000 روپے کی ابتدائی سرمایہ کاری سے ہر ماہ تقریباً 3.5 لاکھ روپے تک کی آمدنی حاصل کی جا سکتی ہے۔ تاہم، پی آئی بی فیکٹ چیک کی تحقیقات میں معلوم ہوا کہ یہ ویڈیو مصنوعی ذہانت (AI) کی مدد سے تیار کیا گیا ایک ڈیپ فیک ہے اور اس کا حکومت ہند یا وزیر اعظم کے کسی سرکاری اعلان سے کوئی تعلق نہیں ہے۔
پی آئی بی فیکٹ چیک نے سوشل میڈیا پلیٹ فارم ایکس پر جاری اپنے بیان میں واضح کیا کہ حکومت نے ایسی کسی سرمایہ کاری اسکیم یا پلیٹ فارم کی منظوری نہیں دی ہے۔ ادارے نے عوام سے اپیل کی ہے کہ وہ کسی بھی مشکوک لنک پر کلک نہ کریں اور اپنی ذاتی، بینکنگ یا مالی معلومات کسی نامعلوم پلیٹ فارم کے ساتھ شیئر نہ کریں۔
حکام کے مطابق، ڈیپ فیک ٹیکنالوجی کے غلط استعمال کے واقعات میں مسلسل اضافہ ہو رہا ہے، جہاں دھوکہ باز مصنوعی ذہانت کے ذریعے معروف شخصیات کی آواز، چہرے اور اندازِ گفتگو کی نقل کر کے جعلی ویڈیوز تیار کرتے ہیں تاکہ لوگوں کو مالی فراڈ کا شکار بنایا جا سکے۔
اگر کسی کو حکومت سے متعلق کوئی مشتبہ یا گمراہ کن معلومات نظر آئے تو وہ اسے PIB فیکٹ چیک کے واٹس ایپ نمبر +91 8799711259 یا ای میل factcheck@pib.gov.in کے ذریعے رپورٹ کر سکتا ہے۔ ماہرین کا مشورہ ہے کہ کسی بھی سرمایہ کاری اسکیم میں رقم لگانے سے قبل ہمیشہ سرکاری ذرائع سے تصدیق کریں اور غیر حقیقی منافع کے دعووں سے محتاط رہیں۔
