کانگریس کے رکن پارلیمنٹ اور لوک سبھا میں قائدِ حزبِ اختلاف راہول گاندھی نے ہفتہ کو نیٹ پیپر لیک اور امتحانی نظام میں مبینہ بے ضابطگیوں کے معاملے پرمرکزی حکومت کو شدید تنقید کا نشانہ بنایا۔ پریس کانفرنس سے خطاب کرتے ہوئے انہوں نے کہا کہ ملک بھر کے طلبہ میں شدید بے چینی پائی جاتی ہے اور حکومت کو ان کے مطالبات کو سنجیدگی سے لینا چاہیے۔
راہل گاندھی نے بھوک ہڑتال کرنے والے طلبہ سے ملاقات کی اور ان کے مطالبات کو قریب سے سنا۔ ان کے مطابق طلبہ کے تین بنیادی مطالبات ہیں، جن پر وہ کسی قسم کا سمجھوتہ کرنے کے لیے تیار نہیں ہیں۔
انہوں نے کہا کہ ان مطالبات میں سب سے اہم مطالبہ مرکزی وزیر تعلیم دھرمیندر پردھان کو عہدے سے ہٹانے کا ہے۔ راہل گاندھی کا کہنا تھا کہ طلبہ کا ماننا ہے کہ امتحانی نظام میں پیدا ہونے والے بحران کی ذمہ داری طے ہونا ضروری ہے اور اس کے لیے احتساب کا عمل شروع کیا جانا چاہیے۔
کانگریس رہنما نے الزام لگایا کہ دھرمیندر پردھان اپنی ذمہ داریاں مؤثر انداز میں نبھانے میں ناکام رہے ہیں۔ ان کے مطابق مسلسل پیپر لیک، امتحانات سے متعلق تنازعات اور طلبہ میں بڑھتی بے چینی اس بات کی نشاندہی کرتی ہے کہ تعلیمی نظام کو مضبوط قیادت کی ضرورت ہے۔
راہل گاندھی نے یہ دعویٰ بھی کیا کہ حکومت کے اندر دھرمیندر پردھان کو وزارتِ تعلیم سے ہٹا کر کسی دوسری وزارت میں بھیجنے پر غور کیا جا رہا ہے۔ تاہم انہوں نے کہا کہ صرف وزارت تبدیل کرنے سے مسئلہ حل نہیں ہوگا۔ ان کے مطابق طلبہ اور عوام کی نظر میں اصل احتساب اسی وقت ممکن ہوگا جب ذمہ داری قبول کی جائے۔
راہل نے کہا، یہ صرف ایک وزیر کا معاملہ نہیں رہا، بلکہ پورے تعلیمی نظام پر عوام کے اعتماد کا سوال بن چکا ہے۔ اگر حکومت واقعی اصلاحات چاہتی ہے تو اسے طلبہ کے خدشات کو سننا ہوگا اور مؤثر فیصلے لینے ہوں گے۔
راہل گاندھی نے کہا کہ ہندوستان کا سب سے بڑا سرمایہ اس کے نوجوان اور طلبہ ہیں۔ اگر ان کے مستقبل پر سوالات اٹھیں گے تو اس کا اثر پورے ملک کی ترقی پر پڑے گا۔ انہوں نے حکومت سے مطالبہ کیا کہ امتحانی نظام کو شفاف بنانے، ذمہ دار افراد کے خلاف کارروائی کرنے اور طلبہ کا اعتماد بحال کرنے کے لیے فوری اقدامات کیے جائیں۔ انہوں نے زور دیتے ہوئے کہا کہ ملک کے نوجوان انصاف اور شفافیت چاہتے ہیں، اور حکومت کو ان کی آواز کو نظر انداز کرنے کے بجائے اس کا مثبت جواب دینا چاہیے۔
