دارالحکومت دہلی میں موسم مکمل طور پر بدل گیاہے ۔ آج صبح تقریباً 5 بجے سے تیز ہواؤں کے ساتھ موسلادھار بارش ہو رہی ہے جس سے کئی مقامات پر پانی جمع ہو گیا ہے۔خراب موسم کے باعث کئی پروازیں بھی متاثر ہوئی ہیں جب کہ طوفان کے باعث کئی مقامات سے نقصان کی اطلاعات موصول ہوئی ہیں۔ہندوستانی محکمہ موسمیات (IMD) نے ہریانہ ، اتر پردیش اور راجستھان میں تیز ہواؤں کے ساتھ درمیانے درجے سے بھاری بارش کی پیش گوئی کی ہے ۔
طوفان کی وجہ سے نقصان:
دہلی این سی آر میں دیر رات سے شروع ہوئی بارش صبح تک تیز ہوگئی۔ جس سے لوگوں کو شدید گرمی سے راحت ملی ہے۔وہیں طوفان کے باعث جنوبی دہلی کے جعفر پور کلاں میں ایک مکان پر درخت گرنے سے 3 بچوں کی موت ہو گئی، جب کہ چاولہ میں مکان کی چھت گرنے سے 4 افراد ملبے تلے دب گئے۔محکمہ موسمیات نے 3 مئی تک طوفان، بارش اور آسمانی بجلی گرنے کا الرٹ جاری کر دیا ہے۔
ان ریاستوں میں بھی گرج چمک اور بارش کا الرٹ :
آئی ایم ڈی نے 3 مئی تک بہار، جھارکھنڈ، اڈیشہ، مغربی بنگال اور سکم میں گرج چمک کے ساتھ طوفان اور بارش کی پیش گوئی کی ہے، اس کے ساتھ تیز ہواؤں کے ساتھ ہوا کی رفتار 60 کلومیٹر فی گھنٹہ تک پہنچ سکتی ہے۔اتر پردیش، پنجاب، ہریانہ اور راجستھان میں آج بارش اور تیز ہوا چلنے کا امکان ہے۔ان ریاستوں میں 6 مئی تک 40-60 کلومیٹر فی گھنٹہ کی رفتار سے گرج چمک اور تیز ہوائیں چلنے کا امکان ہے۔
پہاڑی ریاستوں میں موسم کیسا رہے گا؟
میدانی علاقوں کے ساتھ ساتھ پہاڑی ریاستوں میں بھی موسم مکمل طور پر بدلتا ہوا دکھائی دے رہا ہے۔ ان ریاستوں میں بھی ڈیزاسٹر الرٹ جاری کر دیا گیا ہے۔محکمہ موسمیات کے مطابق 6 مئی کے دوران جموں و کشمیر، لداخ، ہماچل پردیش اور اتراکھنڈ میں 40-60 کلومیٹر فی گھنٹہ کی رفتار سے گرج چمک اور تیز ہوائیں چلنے کا امکان ہے ۔3مئی کو، اتراکھنڈ میں الگ تھلگ مقامات پر 60 کلومیٹر فی گھنٹہ کی رفتار سے ژالہ باری اور تیز ہواؤں کا امکان ہے۔
جنوبی ریاستوں میں موسلادھار بارش کی وارننگ :
جنوبی ہند کی ریاستوں میں بھی بارش اور طوفان کا امکان ظاہر کیا گیا ہے۔ اگلے 6 دنوں کے دوران کرناٹک، آندھرا پردیش، تلنگانہ ، کیرالہ، تمل ناڈو اور پڈوچیری میں گرج چمک کے ساتھ طوفان کا امکان ہے ۔اگلے 5 دنوں کے دوران شمال مشرقی ہندوستان میں گرج چمک کے ساتھ تیز ہوائیں چلنے کا امکان ہے۔محکمہ موسمیات نے 5 مئی کو اروناچل پردیش، آسام اور میگھالیہ میں شدید بارش کی وارننگ جاری کی ہے۔
