تمل ناڈو میں اسمبلی انتخابات 2026 کے لیے سیاسی سرگرمیاں عروج پر پہنچ چکی ہیں، جہاں نامزدگیوں کا مرحلہ باضابطہ طور پر شروع ہو چکا ہے۔ ریاست کی تمام 234 اسمبلی نشستوں پر 23 اپریل کو ایک ہی مرحلے میں ووٹنگ ہوگی، جس کے پیش نظر تمام بڑی سیاسی جماعتیں بھرپور تیاریوں میں مصروف ہیں۔
وزیراعلیٰ نے پرچہ نامزدگی داخل کی
اسی سلسلے میں ریاست کے وزیراعلیٰ M. K. Stalin نے پیر کے روز کولاتھور اسمبلی حلقے سے اپنی نامزدگی داخل کی۔ وہ اس نشست سے مسلسل چوتھی بار کامیابی حاصل کرنے کے خواہاں ہیں۔ اسٹالن نے پیپر ملز روڈ پر قائم ریٹرننگ آفیسر کے دفتر پہنچ کر اپنی نامزدگی جمع کرائی، جہاں ان کے ہمراہ سینئر پارٹی رہنما بھی موجود تھے۔
200سے زائد سیٹیں جیتنےکاعزم
نامزدگی کے موقع پر ڈی ایم کے کارکنان اور حامیوں کی بڑی تعداد جمع ہوئی، جس سے سیاسی ماحول خاصا گرم دکھائی دیا۔ میڈیا سے بات کرتے ہوئے اسٹالن نے ڈی ایم کے اتحاد کی جیت پر بھرپور اعتماد کا اظہار کیا اور دعویٰ کیا کہ عوام ایک بار پھر ان کی حکومت پر اعتماد کریں گے۔ انہوں نے کہا کہ ان کی جماعت 200 سے زائد نشستیں حاصل کرے گی۔
اسٹالن کا روڈ شو
نامزدگی جمع کرانے کے بعد اسٹالن نے کولاتھور میں روڈ شو بھی کیا، جس میں بڑی تعداد میں عوام نے شرکت کی۔ سڑکوں کے اطراف کھڑے حامیوں نے پارٹی پرچم لہرا کر ان کا استقبال کیا۔ اس موقع پر انہوں نے ایک کتابچہ بھی جاری کیا، جس میں حلقے میں کیے گئے ترقیاتی کاموں اور فلاحی اسکیموں کی تفصیل شامل ہے۔
وجے نے بھی داخل کیا پرچہ نامزدگی
دوسری جانب فلمی دنیا سے سیاست میں قدم رکھنے والے معروف اداکار Vijay نے بھی پیر کے روز پیرمبور اسمبلی حلقے سے اپنی نامزدگی داخل کر دی۔ وہ اپنی جماعت تملگا وتری کژگم (TVK) کے سربراہ ہیں اور یہ ان کی پہلی انتخابی آزمائش ہے۔وجے نے ویاسرپاڈی کے ڈاکٹر امبیڈکر گورنمنٹ آرٹس کالج میں قائم ریٹرننگ آفیسر کے دفتر میں اپنی نامزدگی جمع کرائی۔ اس موقع پر پارٹی کے سینئر رہنما بھی ان کے ہمراہ موجود تھے۔ وجے کی آمد سے قبل ہی ہزاروں کی تعداد میں ان کے مداح اور کارکنان سڑکوں پر جمع ہو گئے، جس کے باعث علاقے میں ٹریفک کی صورتحال متاثر ہوئی۔
وجے کی انٹری نے سیاسی منظرنامہ کو دلچسپ بنا دیا
وجے کے قافلے کے گزرنے کے دوران کئی مقامات پر ٹریفک جام بھی دیکھنے میں آیا، جبکہ کچھ افراد نے ان کے ساتھ سیلفی لینے کے لیے اپنی گاڑیاں روک دیں، جس سے وقتی طور پر آمدورفت متاثر ہوئی۔ پولیس نے موقع پر پہنچ کر صورتحال کو قابو میں کیا۔سیاسی مبصرین کے مطابق، وجے کی انتخابی سیاست میں انٹری نے تمل ناڈو کے سیاسی منظرنامے کو مزید دلچسپ بنا دیا ہے، خاص طور پر چنئی کے اہم حلقوں میں مقابلہ سخت ہونے کا امکان ہے۔
تمل ناڈو میں انتخابی مہم تیز
تمل ناڈو اسمبلی انتخابات کے لیے نامزدگیوں کا مرحلہ جاری ہے اور آنے والے دنوں میں انتخابی مہم مزید تیز ہونے کی توقع ہے۔ ریاست کی سیاست میں جہاں ایک طرف روایتی جماعتیں اپنی گرفت مضبوط رکھنے کی کوشش کر رہی ہیں، وہیں نئے سیاسی چہرے بھی عوام کی توجہ حاصل کرنے میں مصروف ہیں۔ ایسے میں یہ دیکھنا دلچسپ ہوگا کہ 23 اپریل کو ہونے والی ووٹنگ کے بعد اقتدار کا تاج کس کے سر سجتا ہے۔
