ہندوستان کی انڈر 19 کرکٹ ٹیم کے نائب کپتان اور ابھرتے ہوئے نوجوان بلے باز لکشیہ رائے چندرانی اپنے آبائی ضلع گونڈہ پہنچے، جہاں ان کا شانداراستقبال کیا گیا۔ ان کی آمد پر کرکٹ شائقین، مقامی باشندوں، سماجی شخصیات اور نوجوانوں کی بڑی تعداد موجود تھی، جنہوں نے پھول مالائیں پہنا کر، تالیوں اور نعروں کے ساتھ اپنے ہیرو کا استقبال کیا۔ لکشیہ کی حالیہ کامیابیوں نے نہ صرف ان کے خاندان بلکہ پورے گونڈہ ضلع میں خوشی اور فخر کی لہر دوڑا دی ہے۔
لکشیہ رائے چندرانی نے حال ہی میں ہندوستانی انڈر 19 ٹیم کے ساتھ سری لنکا کے کامیاب دورے میں اپنی شاندار بلے بازی سے سب کو متاثر کیا۔ اس دورے کے دوران انہوں نے ایک یادگار ڈبل سنچری اور ایک شاندار سنچری اسکور کرتے ہوئے ثابت کر دیا کہ وہ مستقبل میں ہندوستانی کرکٹ کے بڑے ستاروں میں شمار کیے جا سکتے ہیں۔ ان کی بہترین تکنیک، اعتماد سے بھرپور انداز اور لمبی اننگز کھیلنے کی صلاحیت نے نہ صرف شائقین بلکہ سابق کرکٹرز اور ماہرین کرکٹ کی بھی توجہ اپنی جانب مبذول کرائی۔
لکشیہ اس وقت اتراکھنڈ کرکٹ ٹیم کی نمائندگی کر رہے ہیں اور کم عمری کے باوجود مسلسل عمدہ کارکردگی کا مظاہرہ کر رہے ہیں۔ انہوں نے مختلف قومی سطح کے ٹورنامنٹس میں اپنی صلاحیتوں کا لوہا منوایا ہے اور ہر موقع پر ذمہ دارانہ بلے بازی کرتے ہوئے ٹیم کی کامیابی میں اہم کردار ادا کیا ہے۔
گونڈہ پہنچنے پر لکشیہ نے اپنے خیرمقدم پر تمام لوگوں کا شکریہ ادا کیا اور کہا کہ انہیں اپنے ضلع اور اپنے لوگوں سے ہمیشہ محبت اور حوصلہ افزائی ملی ہے۔ انہوں نے کہا کہ وہ مستقبل میں بھی ملک کے لیے بہترین کارکردگی کا مظاہرہ کرنے کی پوری کوشش کریں گے اور اپنی محنت کے ذریعے ہندوستانی سینئر ٹیم میں جگہ بنانے کا خواب پورا کرنا چاہتے ہیں۔
قابلِ ذکر بات یہ ہے کہ لکشیہ رائے چندرانی کا گونڈہ سے گہرا تعلق ہے۔ وہ گونڈہ کے سابق رکن اسمبلی تلسی داس کے پوتے ہیں، جس کی وجہ سے ان کی کامیابی پر پورے ضلع میں خصوصی جوش و خروش دیکھنے کو ملا۔ مقامی لوگوں کا کہنا ہے کہ لکشیا نے اپنی محنت، لگن اور صلاحیت کے بل پر نہ صرف اپنے خاندان بلکہ گونڈہ اور اتر پردیش کا نام بھی روشن کیا ہے۔ کرکٹ شائقین کو امید ہے کہ وہ آنے والے برسوں میں ہندوستانی سینئر ٹیم کا حصہ بن کر عالمی سطح پر بھی ملک کا نام روشن کریں گے۔
