12جون 2025 کو گجرات کے احمد آباد میں ایئرانڈیا کےطیارے کے حادثے میں ہلاک ہونے والے 206 افراد کی شناخت ڈی این اے ٹیسٹ کے ذریعے کی گئی ہے۔ اب تک 169 لاشیں ان کے لواحقین کے حوالے کی جا چکی ہیں۔ حکام نے بتایا کہ مزید 33 ہلاک شدگان کی لاشوں کی شناخت اور ان کے حوالے کرنے کا عمل مختلف مراحل میں ہے۔ ان کا کہنا تھا کہ پانچ افراد کے ڈی این اے ٹیسٹ ابھی جاری ہیں۔ ان کا کہنا تھا کہ 15 لاشوں کی شناخت کے لیے لواحقین سے اضافی نمونے لینے ہوں گے۔ مزید 10 افراد کی لاشیں ان کے لواحقین کے حوالے کرنے کا عمل جاری ہے۔
شناخت شدہ لاشیں روانہ
دریں اثنا، ایئر انڈیا کے حادثے میں ہلاک ہونے والوں میں سے دو غیر ملکیوں کی لاشیں ان کے ملکوں کو روانہ کر دی گئی ہیں۔ 11 لاشیں گجرات سے باہر دیگر ریاستوں کو بھیجی گئی ہیں۔ ڈی این اے ٹیسٹ کے ذریعے جن 202 لاشوں کی شناخت کی گئی ہے، ان میں سے زیادہ تر کو ایمبولینس میں گجرات کے مختلف حصوں میں سڑک کے ذریعے بھیجا گیا ہے۔ فلائٹ میں سوار مرنے والوں میں 123 ہندوستانی، 27 برطانوی شہری، چار پرتگالی اور ایک کینیڈین شہری تھا۔ چار غیر مسافر بھی حادثہ میں مارے گئے۔
طیارہ حادثے کی جانچ میں اہم انکشاف
طیارے کے حادثے کی تحقیقات میں ایک اہم نکتہ سامنے آیا ہے۔ حکام کو پتہ چلا ہے کہ حادثے کا شکار ہونے والی ایئر انڈیا کی پرواز AI 171 کا دائیں انجن تین ماہ قبل اوور ہال کے دوران نصب کیا گیا تھا۔ بوئنگ 787 ڈریم لائنر، جو تقریباً 12 سال سے سروس میں ہے، آخری بار جون 2023 میں سروس کی گئی تھی۔ اگلی سروس دسمبر 2025 میں ہونی ہے۔
ملکی تاریخ کا بڑا ایوی ایشن انشورنس کلیم
اندازہ لگایا گیا ہے کہ اس حادثے کے نتیجے میں ملکی تاریخ کا سب سے بڑا ایوی ایشن انشورنس کلیم ہو سکتا ہے۔ ایئر انڈیا نے انجن کی تبدیلی سے پہلے حادثے کا شکار ہونے والے بوئنگ ڈریم لائنر کی انشورنس کوریج کو 750 کروڑ روپے سے بڑھا کر 850 کروڑ روپے کر دیا ہے۔ پبلک سیکٹر کی نان لائف انشورنس کمپنی جنرل انشورنس کارپوریشن آف انڈیا (جی آئی سی) نے حادثے کےمجموعی دعووں کا تخمینہ تقریباً 475 ملین ڈالر لگایا ہے۔ ہندوستانی کرنسی میں یہ 4,000 کروڑ روپے سے زیادہ ہے۔ اس رقم میں سے، 125 ملین ڈالر طیارے کے نقصان کے لیے ہیں، جب کہ مزید 350 ملین ڈالر مسافروں کے اہل خانہ، تیسرے فریق کے نقصانات، دوسرے افراد کو ہونے والے نقصانات اور سفری پالیسیوں کے لیے ادا کیے جائیں گے۔
