احمد آباد میں ایئر انڈیا کی پروازگر کر تباہ ہونے کے پانچ دن بعد، ہسپتال کے حکام نے ڈی این اے میچنگ کے ذریعے 92 افراد کی شناخت کی ہے۔ اس حادثے میں 274 افراد ہلاک ہو چکے ہیں۔ حکام نے بتایا کہ اب تک 47 افراد کی لاشیں ان کے اہل خانہ کے حوالے کی جا چکی ہیں۔ جن لوگوں کی لاشیں حوالے کی گئیں ان کا تعلق احمد آباد، وڈودرا، کھیڑا، بوٹاڈ اور دیگر مقامات سے ہے۔ دوسری طرف، گجرات حکومت نے پیر کو سابق سی ایم وجے روپانی کے لیے ریاستی سوگ کا اعلان کیا ہے۔ ان کی آخری رسومات راجکوٹ میں شام کو ادا کی جائیں گی۔ اس طیارے میں وجے روپانی بھی سوار تھے۔
ڈی این اے ٹیسٹ کرنے والی ٹیم میں 590 افراد شامل:
ڈی این اے ٹیسٹ کرنے والی ٹیم میں کل 590 افراد شامل ہیں۔ جن میں سے 36 فرانزک ماہرین ہیں۔ ٹیم میں 8 خواتین اور 554 طبی عملہ شامل ہے۔ ڈی این اے رپورٹ تیار ہونے کے بعد لواحقین سے رابطہ کرنے کے بعد اسے حوالے کیا جا رہا ہے۔ معلومات کے مطابق ایمبولینسوں کے ذریعے لاشوں کو سکیورٹی کے ساتھ ان کے گھروں تک پہنچایا جا رہا ہے۔ اس کے لیے 230 ٹیمیں تشکیل دی گئی ہیں جو مرنے والوں کے لواحقین سے براہ راست رابطے میں ہیں۔ اسکے علاوہ 192 ایمبولینسیں اور گاڑیاں اسٹینڈ بائی پر ہیں۔ حادثے میں جان گنوانے والے کچھ غیر ملکی شہریوں کے لواحقین احمد آباد پہنچ گئے ہیں۔ لاشوں کو رکھنے کے لیے 100 تابوت وڈودرا سے احمد آباد لائے گئے ہیں۔اس وقت 13 متوفی افراد کے لواحقین پوسٹ مارٹم کے مقام پر موجود ہیں ،جنہیں جلد ان کے ورثاء کے حوالے کر دیا جائے گا۔
حادثے میں صرف ایک شخص کی بچی جان :
طیارے میں سوار صرف ایک شخص حادثے سے بچ گیا۔ اس واقعے میں میڈیکل کالج کے پانچ طالب علموں سمیت 29 دیگر افراد کی بھی موت ہو گئی۔ گورنمنٹ بی جے میڈیکل کالج کے سرجری کے پروفیسر ڈاکٹر پٹیل نے بتایا کہ اس واقعے میں زخمی ہونے والے 51 افراد میں سے 38 کو ڈسچارج کر دیا گیا ہے، جب کہ 13 ابھی بھی زیر علاج ہیں۔ بی جے میڈیکل کالج جونیئر ڈاکٹرز ایسوسی ایشن کے صدر ڈاکٹر دھول گامٹی کے مطابق، جائے حادثہ سے احمد آباد سول اسپتال میں تقریباً 270 لاشیں لائی گئیں۔ ریاستی ریلیف کمشنر آلوک کمار پانڈے نے صحافیوں کو بتایا کہ طیارہ حادثے میں ہلاک ہونے والے تمام 230 مسافروں کے اہل خانہ سے رابطہ کیا گیا ہے۔
صرف تین مسافر ارکان نے اب تک اپنے ڈی این اے کے نمونے نہیں دیے ہیں کیونکہ وہ بیرون ملک رہتے ہیں۔ کل شام تک ان کے پہنچنے کی امید ہے۔ لاش کے ساتھ، ہم موت کا سرٹیفکیٹ بھی لواحقین کے حوالے کر رہے ہیں تاکہ انہیں بعد میں کسی پریشانی کا سامنا نہ کرنا پڑے۔
