مرکزی وزارت داخلہ نے ہندوستان کی 16ویں مردم شماری کے لیے نوٹیفکیشن جاری کر دیا ہے۔ہندوستان کی آبادی کی مردم شماری سال 2027 میں کی جائے گی۔ اس سلسلے میں گزٹ نوٹیفکیشن جاری کر دیا گیا ہے۔ مردم شماری کا پورا عمل یکم مارچ 2027 تک مکمل ہو جائے گا جو تقریباً 21 ماہ میں مکمل ہو گا۔ مردم شماری کے ابتدائی اعداد و شمار مارچ 2027 میں جاری کیے جاسکتے ہیں، جب کہ تفصیلی اعداد و شمار کے اجرا میں دسمبر 2027 تک کا وقت لگ سکتا ہے۔خیال رہے کہ قبل ازیں کل مرکزی وزیر داخلہ امیت شاہ نے مرکزی داخلہ سکریٹری گووند موہن، رجسٹرار جنرل اور مردم شماری کمشنر اور دیگر سینئر حکام کے ساتھ آئندہ مردم شماری کی تیاریوں کا بھی جائزہ لیا تھا۔
آزادی کے بعد 8ویں مردم شماری :
یہ ملک کی 16ویں مردم شماری اور آزادی کے بعد 8ویں مردم شماری ہے۔ مردم شماری دو مرحلوں میں کی جائے گی۔ لداخ جیسے برف پوش علاقوں میں یکم اکتوبر 2026 تک اور ملک کے باقی حصوں میں یکم مارچ 2027 تک مردم شماری مکمل ہو جائے گی۔ مردم شماری میں 1.3 لاکھ اہلکار شامل ہوں گے۔ اس بار ذات پات کی مردم شماری بھی کرائی جائے گی۔ یہ مردم شماری دو مرحلوں میں مکمل کی جائے گی۔ جس میں 34 لاکھ سروے سپروائزر ڈیٹا اکٹھا کریں گے۔وہیں ملک میں پہلی بار مردم شماری اور ذات پات کی مردم شماری ایک ساتھ کی جا رہی ہے۔
کورونا وبا ء کی وجہ سے ہوئی تاخیر:
آپ کو بتا دیں کہ مردم شماری دنیا کی سب سے بڑی انتظامی مشقوں میں سے ایک ہے، جو وزارت داخلہ کے تحت رجسٹرار جنرل اور مردم شماری کمشنر کے دفتر کے ذریعے کی جاتی ہے۔ کورونا وباء کے باعث 2021 میں ہونے والی مردم شماری ملتوی کر دی گئی تھی اور اب 2025 میں شروع ہو رہی ہے جس کی وجہ سے اب مردم شماری کا دائرہ بھی تبدیل ہو گیا ہے اور اس کے بعد اگلی مردم شماری 2035 میں کرائی جائے گی۔
