کرناٹک کے منگلورو شہر کے مضافات میں جمعرات کی رات 32سالہ سوہاس شیٹی کو حملہ آوروں کے ایک گروپ نے قتل کر دیا۔ پولیس کے مطابق، سوہاس شیٹی 2022 میں سورتکل میں فاضل قتل کیس کا مرکزی ملزم تھا، اور اس کا تعلق پہلے بجرنگ دل سے تھا۔پولیس کے مطابق، سوہاس شیٹی اپنے دوستوں سنجے، پرجول، انوت، لتیش اور ششانک کے ساتھ گاڑی میں سفر کر رہے تھے۔ اس کے بعد ایک سوئفٹ کار اور ایک پک اپ گاڑی میں سوار حملہ آوروں کے ایک گروپ نے انہیں 'کنی پاڈو کراس' کے قریب روکا۔ 5 سے 6 بدمعاشوں نے سوہاس شیٹی پر مہلک ہتھیاروں سے حملہ کرکے انہیں شدید زخمی کردیا۔ اسے فوری طور پر اے جے اسپتال لے جایا گیا، جہاں ڈاکٹروں نے اسے مردہ قرار دے دیا۔
منگلورو سٹی پولیس کمشنر انوپم اگروال نے واقعے کی تصدیق کرتے ہوئے کہا، باجپے پولس اسٹیشن میں مقدمہ درج کیا گیا ہے۔ ملزم کو جلد از جلد گرفتار کرنے کے لیے کئی ٹیمیں تشکیل دی گئی ہیں۔ انہوں نے کہا کہ سوہاس شیٹی کے خلاف پہلے ہی قتل اور اقدام قتل کے مقدمات درج ہیں۔
کچھ ذرائع کا خیال ہے کہ سوہاس شیٹی کا قتل فاضل کے قتل کا بدلہ لینے کے لیے کیا گیا تھا۔ قتل کی ایک ویڈیو بھی منظر عام پر آئی ہے جس سے لوگوں میں غم و غصہ پایا جاتا ہے۔ واقعے کے بعد ہندو کارکنوں کی بڑی تعداد اے جے اسپتال کے سامنے جمع ہوگئی جس کی وجہ سے کشیدگی مزید بڑھ گئی۔ صورتحال کو قابو میں رکھنے کے لیے ہسپتال کے سامنے پولیس کی بھاری نفری تعینات کر دی گئی ہے۔ پولیس انتظامیہ صورتحال پر گہری نظر رکھے ہوئے ہے اور لوگوں سے امن برقرار رکھنے کی اپیل کر رہی ہے۔
