امریکی صدر ڈونلڈ ٹرمپ کی بیٹی ایوانکا ٹرمپ کو قتل کرنے کی ایک خوفناک بین الاقوامی سازش کو ناکام بناتے ہوئے ایک مشتبہ شخص کو گرفتار کر لیا گیا ہے۔ دی نیویارک پوسٹ کی رپورٹ کے مطابق، اس شخص نے امریکی اور اسرائیلی حملوں میں ہلاک ہونے والے ایرانی کمانڈر قاسم سلیمانی کی موت کا بدلہ لینے کے لیے ایوانکا ٹرمپ کو نشانہ بنانے کا پورا منصوبہ تیار کر رکھا تھا۔ گرفتار ملزم کی شناخت 32 سالہ عراقی شہری محمد باقر ساد داؤد السعدی کے نام سے ہوئی ہے۔
ملزم کے پاس سے ملا ایوانکا کے گھر کا نقشہ:
رپورٹ میں بتایا گیا ہے کہ امریکی تحقیقاتی ادارے ایف بی آئی (FBI) نے السعدی کو کاروائی کے دوران حراست میں لیا۔ تلاشی کے دوران ملزم کے قبضے سے ایوانکا ٹرمپ اور ان کے شوہر جیرڈ کشنر کے فلوریڈا میں واقع گھر کا تفصیلی نقشہ برآمد ہوا ہے۔
ملزم نے اس سے قبل سوشل میڈیا پر امریکی انتظامیہ کو دھمکی دیتے ہوئے لکھا تھا،امریکہ والے یہ بات اچھی طرح سمجھ لیں کہ صرف سخت سیکیورٹی اور سیکریٹ سروس کے بل بوتے پر وہ محفوظ نہیں رہ سکتے۔ ہم ان کی ہر حرکت پر نظر رکھے ہوئے ہیں اور صحیح وقت آنے پر بدلہ لیا جائے گا۔
ایوانکا ٹرمپ کو ہی کیوں نشانہ بنانا چاہتا تھا ملزم؟
تحقیقات کے مطابق، السعدی ایرانی پاسدارانِ انقلاب (IRGC) کے سابق سربراہ قاسم سلیمانی کی ہلاکت کا بدلہ ٹرمپ خاندان سے لینا چاہتا تھا۔رپورٹ میں عراقی سفارت خانے کے ایک سابق ڈپٹی ملٹری اٹیچی کے حوالے سے بتایا گیا ہے کہ قاسم سلیمانی کی موت کے بعد السعدی نے اپنے قریبی لوگوں سے کہا تھا،ہمیں ایوانکا کو مارنا ہوگا تاکہ ہم ٹرمپ کے گھر کو اسی طرح جلا کر راکھ کر سکیں جیسے اس نے (ٹرمپ نے) ہمارا گھر جلایا تھا۔
ملزم کا ایران کی قدس فورس اور حزب اللہ سے تعلق:
امریکی حکام کا کہنا ہے کہ السعدی کے تار لبنان کی عسکری تنظیم حزب اللہ اور ایران کی اسلامک ریولوشنری گارڈ کور (IRGC) سے جڑے ہوئے ہیں۔ بتایا جاتا ہے کہ السعدی کا قاسم سلیمانی کے ساتھ انتہائی قریبی اور ذاتی تعلق تھا۔ 2006 میں اپنے والد کی موت کے بعد وہ سلیمانی کو اپنے والد کی جگہ سمجھتا تھا۔
السعدی کی پرورش بغداد میں اس کی عراقی والدہ نے کی تھی، تاہم بعد میں اسے خصوصی تربیت کے لیے تہران (ایران) بھیجا گیا تھا جہاں اس نے آئی آر جی سی کے تحت ٹریننگ حاصل کی تھی۔
دنیا بھر میں 18 دیگر حملوں کا بھی الزام:
امریکی محکمہ انصاف (DoJ) نے محمد باقر السعدی پر صرف ایوانکا ٹرمپ پر حملے کی سازش کا ہی نہیں، بلکہ یورپ اور امریکہ میں 18 دیگر دہشت گردانہ حملوں اور کوششوں کے سنگین الزامات بھی عائد کیے ہیں۔
حکام کے مطابق، السعدی بین الاقوامی وارداتوں میں بھی مطلوب اور ملوث رہا ہے،ایمسٹرڈیم میں 'بینک آف نیویارک میلن' کی عمارت کو آگ لگانا۔لندن میں دو یہودی شہریوں کو چاقو مار کر قتل کرنا۔ٹورنٹو (کینیڈا) میں امریکی قونصلیٹ کی عمارت پر فائرنگ کرنا۔بیلجیم میں ایک یہودی عبادت گاہ پر بمباری اور روٹرڈیم میں ایک مذہبی مقام کو آگ لگانا ۔
امریکی ایجنسیاں اس نیٹ ورک کے دیگر اراکین کا پتہ لگانے کے لیے ملزم سے مزید تفتیش کر رہی ہیں اور ٹرمپ خاندان کی سیکیورٹی کو مزید سخت کر دیا گیا ہے۔
