اسماعیلی برادری کے 50ویں امام شہزادہ رحیم آغا خان 9 سے 15 ستمبر 2026 تک ہندوستان کے دورے پر رہیں گے۔ یہ 50ویں امام کی ذمہ داری سنبھالنے کے بعد ہندوستان کا ان کا پہلا دورہ ہے۔ یہ دورہ ہندوستان کے نائب صدر کی دعوت پر ہو رہا ہے۔دورے کے دوران شہزادہ رحیم آغا خان صدر جمہوریہ اور وزیراعظم نریندر مودی سے ملاقات کریں گے۔ اس کے علاوہ ان کی ملاقات مرکزی وزیر داخلہ اور وزیر خارجہ سے بھی متوقع ہے۔ نائب صدر کے ساتھ ان کی ملاقات 10 ستمبر کو طے ہے۔
ان ملاقاتوں میں ہندوستان اور اسماعیلی امامت کے درمیان دیرینہ تعلقات کے ساتھ ساتھ ترقیاتی منصوبوں، فلاحی سرگرمیوں اور کمیونٹی سے متعلق مختلف امور پر بات چیت ہونے کی توقع ہے۔دہلی کے علاوہ شہزادہ رحیم آغا خان احمد آباد، ممبئی اور حیدرآباد کا بھی دورہ کریں گے۔ ان شہروں میں آغا خان ڈیولپمنٹ نیٹ ورک (AKDN) کے مختلف ترقیاتی اور کمیونٹی منصوبے جاری ہیں۔ ہندوستان میں اسماعیلی برادری کی موجودگی گجرات، مہاراشٹر، راجستھان اور پنجاب سمیت کئی ریاستوں میں ہے۔
ہندوستانی جماعت سے ملاقات کے خواہاں
رپورٹ کے مطابق شہزادہ رحیم آغا خان نے ہندوستان میں مقیم اسماعیلی جماعت سے ملاقات کی خواہش کا اظہار کیا ہے۔ انہوں نے ہندوستان سے باہر رہنے والے اسماعیلی افراد سے اپیل کی ہے کہ وہ ان کے دورے کے دوران ہندوستان کا سفر نہ کریں، تاکہ وہ اپنی توجہ ہندوستان میں رہنے والی مقامی جماعت سے ملاقات پر مرکوز کر سکیں۔اپنے پیغام میں انہوں نے ہندوستانی جماعت کو اپنی ’’پیارے روحانی بچے‘‘ قرار دیتے ہوئے کہا کہ وہ ہمیشہ ان کے خیالات اور دعاؤں میں رہتے ہیں۔
بی جے پی کے سابق ترجمان شہزاد پونا والا نے بھی شہزادہ رحیم آغا خان کے ہندوستان دورے کا خیرمقدم کیا۔ انہوں نے کہا کہ یہ دورہ ہندوستان اور اسماعیلی امامت کے درمیان دیرینہ دوستی، باہمی احترام اور مشترکہ اقدار کی عکاسی کرتا ہے۔ شہزادہ رحیم آغا خان پنجم نے فروری 2025 میں اپنے والد مرحوم شہزادہ شاہ کریم الحسینی آغا خان چہارم کے انتقال کے بعد اسماعیلی برادری کے 50ویں امام کی ذمہ داری سنبھالی۔ امام بننے سے پہلے وہ آغا خان ڈیولپمنٹ نیٹ ورک میں مختلف ذمہ داریاں نبھاتے رہے، جن میں ماحولیات، موسمیاتی تبدیلی اور اقتصادی ترقی سے متعلق کام بھی شامل تھے۔
