cafd3d39-0134-47c8-857b-0c0f17bde9942182026165643.png)
تلنگانہ کے وزیر اعلیٰ اے ریونت ریڈی کو امریکہ کا دورہ منسوخ کرنا پڑا ہے۔ مرکزی حکومت نے ریونت ریڈی کا امریکہ کا دورہ روک دیا اور کہا گیا کہ اس فیصلے کے پیچھے سیاسی وجہ ہے۔ ریونت ریڈی اس وقت لندن میں ہیں اور اب 23 اگست کو حیدرآباد واپس پہنچیں گے۔ ان کا منصوبہ لندن کے بعد امریکہ جانے کا تھا، جہاں انہیں بوسٹن اور نیویارک کا دورہ کرنا تھا۔ امریکہ میں انڈین اوورسیز کانگریس کی میٹنگ میں شرکت کا بھی پروگرام تھا۔ اس کے علاوہ وہ تعلیم، سرمایہ کاری اور تلنگانہ میں عالمی اداروں کے ساتھ شراکت داری کے حوالے سے مختلف ملاقاتیں کرنے والے تھے۔
مرکز نے صرف برطانیہ جانے کی اجازت دی
ریاستی حکومت نے برطانیہ اور امریکہ دونوں کے دوروں کے لیے مرکزی حکومت سے اجازت طلب کی تھی۔ حکام کے مطابق مرکز کی جانب سے صرف برطانیہ کے دورے کی اجازت دی گئی۔ ریونت ریڈی کے برطانیہ پہنچنے کے بعدبتایا گیا کہ امریکہ کے دورے کے لیے اجازت نہیں دی گئی ہے۔ اس کے بعد ریونت ریڈی نے اپنا امریکی دورہ منسوخ کرکے حیدرآباد واپس آنے کا فیصلہ کیا۔
ریونت ریڈی نے فیصلے پر کیا کہا؟
مرکزی حکومت کے فیصلے پر ردعمل دیتے ہوئے ریونت ریڈی نے کہا کہ امریکہ کے دورے کا بنیادی مقصد دنیا کے بہترین تعلیمی اداروں کو ہندوستان، تلنگانہ اور حیدرآباد سے جوڑنا تھا۔ انہوں نے کہا کہ اس سے تلنگانہ کے نوجوانوں کو دنیا کی معروف یونیورسٹیوں اور اداروں سے تعلیم، ہنر اور تربیت حاصل کرنے کے مواقع مل سکتے تھے۔ ریونت ریڈی نے کہا کہ قوم کی تعمیر اور نوجوانوں کے مستقبل جیسے معاملات میں سیاست اور انتخابات سے بالاتر ہوکر سوچنے کی ضرورت ہے۔
دورہ امریکہ منسوخ،مگرمنصوبے جاری رہیں گے
دورہ منسوخ ہونے کے باوجود ریونت ریڈی نے حکام کو ہدایت دی ہے کہ امریکہ سے متعلق طے شدہ کام جاری رکھے جائیں۔ انہوں نے افسران کو ہدایت دی کہ تلنگانہ میں سرمایہ کاری، تعلیم اور عالمی تعاون سے متعلق معاہدوں کا کام جاری رکھا جائے۔
حیدرآباد کو عالمی تعلیمی مرکز بنانے کا عزم
ریونت ریڈی نے حیدرآباد کو عالمی تعلیمی مرکز بنانے کے عزم کا بھی اظہار کیا۔ انہوں نے کہا کہ عثمانیہ یونیورسٹی، حیدرآباد یونیورسٹی اور جے این ٹی یو سمیت مختلف تعلیمی اداروں نے شہر کو اعلیٰ تعلیم کا مرکز بنانے میں اہم کردار ادا کیا ہے۔ انہوں نے حیدرآباد پبلک اسکول اور IIT، ISB، IIIT اور "NALSAR" جیسے اداروں کا بھی ذکر کیا اور کہا کہ ان اداروں نے حیدرآباد کو عالمی سطح پر تعلیم، ٹیکنالوجی اور کاروبار کے لیے اہم مقام بنانے میں مدد کی ہے۔
