روسی صدر ولادیمیر پوتن نے بھارتی وزیراعظم نریندر مودی کو 24ویں ہند-روس سالانہ سربراہی اجلاس میں شرکت کے لیے روس آنے کی دعوت دی ہے۔ وزیراعظم مودی نے صدرپوتن کی دعوت قبول کر لی ہے۔ دونوں ممالک کے سفارتی ذرائع باہمی سہولت کو مدنظر رکھتے ہوئے سربراہی اجلاس کی تاریخ طے کریں گے۔ وزیراعظم نریندر مودی اور صدر ولادیمیر پوتن کے درمیان ہونے والی ملاقات میں بھارت اور روس کے درمیان دوطرفہ تعلقات اور مختلف شعبوں میں تعاون کی پیش رفت کا جائزہ لیا گیا۔ دونوں رہنماؤں نے سیاست، معیشت، دفاع، توانائی، خلائی تعاون، ہنرمند افرادی قوت کی نقل و حرکت اور عوامی سطح پر رابطوں سمیت متعدد اہم امور پر تبادلہ خیال کیا۔
دونوں رہنماؤں نے بھارت میں پہلی مرتبہ منعقد ہونے والی روس کی بین الاقوامی صنعتی نمائش ’اینوپروم انڈیا‘ کا خیرمقدم کیا۔ یہ نمائش 9 سے 11 ستمبر 2026 تک منعقد ہوئی۔ وزیراعظم مودی اور صدر پیوٹن نے نمائش کا دورہ بھی کیا اور وہاں موجود شرکاء سے بات چیت کی۔ دونوں رہنماؤں نے ’اینوپروم انڈیا‘ کو بھارت اور روس کے درمیان تجارتی اور صنعتی تعاون کو مزید مضبوط بنانے کی جانب ایک اہم قدم قرار دیا۔ ملاقات کے دوران 2026 میں بھارت کی برکس صدارت کے تحت کثیرالجہتی تعاون سے متعلق امور پر بھی تبادلہ خیال کیا گیا۔ دونوں رہنماؤں نے عالمی اور علاقائی صورتحال کا جائزہ لیتے ہوئے مغربی ایشیا اور بحیرہ اسود کے خطے میں جاری تنازعات پر بھی اپنے خیالات کا اظہار کیا۔
دونوں رہنماؤں نے جاری تنازعات کے سمندری تجارت اور بھارتی ملاحوں کی سلامتی پر پڑنے والے ممکنہ اثرات پر بھی بات کی۔ وزیراعظم مودی نے ایک بار پھر اس مؤقف کا اظہار کیا کہ تنازعات کا پائیدار حل مذاکرات اور سفارت کاری کے ذریعے ہی ممکن ہے۔ وزیراعظم نے امن کی کوششوں میں تعاون کے لیے بھارت کی آمادگی کا بھی اعادہ کیا۔ اس دوران دونوں رہنماؤں نے عالمی سطح پر امن، استحکام اور تعاون کی اہمیت پر زور دیا۔
ملاقات کے اختتام پر وزیراعظم مودی اور صدرپوتن نے بھارت اور روس کے درمیان ’خصوصی اور مراعات یافتہ اسٹریٹجک شراکت داری‘ کو مزید مضبوط بنانے کے لیے کوششیں جاری رکھنے پر اتفاق کیا۔دونوں رہنماؤں نے اس بات کا بھی مشاہدہ کیا کہ موجودہ جغرافیائی سیاسی غیر یقینی صورتحال کے باوجود بھارت اور روس کے باہمی تعلقات نے مسلسل مضبوطی اور پائیداری کا مظاہرہ کیا ہے۔ آنے والے 24ویں سالانہ سربراہی اجلاس کو دونوں ممالک کے درمیان دفاع، توانائی، تجارت، ٹیکنالوجی اور دیگر شعبوں میں تعاون کو مزید آگے بڑھانے کے لیے اہم موقع کے طور پر دیکھا جا رہا ہے۔
