مغربی بنگال کے سیاسی حلقوں سے ایک سنسنی خیز اور بڑی خبر سامنے آ رہی ہے، جہاں ساؤتھ دم دم میونسپلٹی کے ترنمول کانگریس (TMC) کے سرکردہ کونسلر سنجے داس کی پھندا لگی ہوئی لاش برآمد ہوئی ہے۔ ان کی لاش شمالی 24 پرگنہ ضلع کے دم دم علاقے میں واقع ان کے اپنے ہی گھر کے اندر سے لٹکتی ہوئی پائی گئی۔
واقعے کے فوراً بعد لاش کو دم دم ناگر بازار علاقے کے ایک نجی اسپتال لے جایا گیا، جہاں ڈاکٹروں نے انہیں مردہ قرار دیا۔ ذرائع کے مطابق، سنجے داس راجر ہاٹ گوپال پور اسمبلی حلقے کی سابق ایم ایل اے اور معروف گلوکارہ ادیتی منشی کے شوہر تھے اور ٹی ایم سی رہنما دیوراج چکرورتی کے انتہائی قریبی ساتھیوں میں شمار کیے جاتے تھے۔
حکومت کی تبدیلی کے بعد سے ذہنی تناؤ :
ذرائع اور قریبی حلقوں کے مطابق، ریاست میں حالیہ سیاسی تبدیلی اور ترنمول کانگریس کی شکست کے بعد سے سنجے داس شدید ذہنی تناؤ کا شکار تھے۔ پولیس نے معاملے کی سنگینی کو دیکھتے ہوئے تحقیقات شروع کر دی ہیں اور لاش کو پوسٹ مارٹم کے لیے بھیج دیا گیا ہے تاکہ موت کی اصل وجوہات کا تعین کیا جا سکے۔
بنگال کی نئی سیاست اور ٹی ایم سی خیمے میں کھلبلی:
واضح رہے کہ مغربی بنگال کے حالیہ اسمبلی انتخابات میں بی جے پی نے تاریخی اور یکطرفہ کامیابی حاصل کی ہے، جس کے بعد بی جے پی رہنما سویندو ادھیکاری ریاست کے نئے وزیر اعلیٰ بنے ہیں۔ اس الیکشن میں ترنمول کانگریس کو کراری ہار کا سامنا کرنا پڑا ہے اور وہ اب اپوزیشن کی نشستوں پر ہے۔بی جے پی نے شاندار کارکردگی کا مظاہرہ کرتے ہوئے 207 سیٹیں جیتیں، جبکہ ترنمول کانگریس صرف 80 سیٹوں پر سمٹ کر رہ گئی۔
انتخابی نتائج کے بعد سے ہی ٹی ایم سی کے کارکنوں اور رہنماؤں میں مایوسی اور غم و غصے کی لہر دوڑ رہی ہے۔ایسے ماحول میں کونسلر سنجے داس کی مشتبہ موت نے سیاسی سرگرمیوں کو مزید گرما دیا ہے۔
وزیر اعلیٰ سویندو ادھیکاری کی دھمکی:
حال ہی میں وزیر اعلیٰ سویندو ادھیکاری کا ایک بڑا بیان بھی سامنے آیا تھا، جس میں انہوں نے اپوزیشن کو سخت پیغام دیتے ہوئے کہا تھا کہ ترنمول کانگریس کے دورِ اقتدار میں ہمارے (بی جے پی) کارکنوں پر جو مظالم ڈھائے گئے ہیں، میں انہیں بھولا نہیں ہوں۔ پولیس کو واضح ہدایات دی گئی ہیں کہ ماضی میں ہونے والے تمام سیاسی جرائم اور تشدد کے معاملات پر فوری ایف آئی آر (FIR) درج کر کے سخت کاروائی کی جائے۔
بنگال میں ’بلڈوزر‘ کاروائی سے سیاست تیز:
ریاست میں بی جے پی کی حکومت بنتے ہی یوپی کی طرز پر 'بلڈوزر ایکشن' بھی شروع ہو چکا ہے۔ کولکتہ کے بڑے اور مصروف ترین ریلوے اسٹیشنوں ہاوڑہ اور سیالدہ کے آس پاس موجود غیر قانونی تعمیرات اور تجاوزات کو بلڈوزر کے ذریعے مسمار کیا جا رہا ہے۔ اس کاروائی پر بات کرتے ہوئے وزیر دلیپ گھوش نے صاف کیا ہے کہ ریاست میں جہاں کہیں بھی غیر قانونی تعمیرات یا سرکاری زمین پر ناجائز قبضہ پایا جائے گا، وہاں بلڈوزر کا استعمال سختی سے کیا جائے گا۔ حکومت کی اس سخت گیر پالیسی نے اپوزیشن اور ٹی ایم سی خیمے پر دباؤ مزید بڑھا دیا ہے۔
