حیدرآباد میں ایک بار پھر گرین کوریڈور کے ذریعے انسانیت کی ایک عمدہ مثال دیکھنے کو ملی، جب بنگلورو سے لائے گئے پھیپھڑوں کو شمش آباد ایئرپورٹ سے سیکنڈرآباد کے KIMS ہسپتال تک تیزی سے پہنچایا گیا۔زندگی بچانے کی ایک اہم کڑی کے طور پر حیدرآباد سٹی پولیس نے بہترین ہم آہنگی کا مظاہرہ کرتے ہوئے گرین کوریڈور تیار کیا۔ بنگلورو سے ایک پرواز کے ذریعے پھیپھڑے (لنگز) شمش آباد ایئرپورٹ پر پہنچے، جہاں سے انہیں فوری طور پر ایمبولینس کے ذریعے ہسپتال لے جایا گیا۔
ایمبولینس کو ہسپتال تک پہنچانے کے لیے خصوصی ٹریفک انتظامات:
ایمبولینس (TG09U0642) کو سیکنڈرآباد کے منسٹر روڈ پرواقع کیمس ہسپتال تک پہنچانے کے لیے خصوصی ٹریفک انتظامات کیے گئے۔ پولیس نے پورے روٹ کو پہلے ہی کلیئر کر دیا تھا، جس سے ایمبولینس بغیر کسی رکاوٹ کے تیزی سے اپنے منزل تک پہنچ سکی۔
محدود وقت میں مریض تک حساس عضو پہنچانا ضروری:
عہدیداروں نے بتایا کہ اعضاء کی منتقلی کے معاملات میں وقت بہت اہم ہوتا ہے۔ پھیپھڑوں جیسے حساس عضو کو محدود وقت کے اندر مریض تک پہنچانا ضروری ہوتا ہے، اس لیے ہر سیکنڈ قیمتی ہوتا ہے۔اسی کو مدنظر رکھتے ہوئے ٹریفک پولیس نے پوری تیاری سے کام کیا۔ اس دوران شہر کے مختلف چوراہوں پر ٹریفک کو کنٹرول کیا گیا اور سگنلز کو عارضی طور پر روکا گیا، تاکہ ایمبولینس کو کہیں بھی رکاوٹ کا سامنا نہ کرنا پڑے۔ پولیس ٹیم نے پورے راستے پر ایسکورٹ دیتے ہوئے ایمبولینس کو محفوظ طریقے سے ہسپتال تک پہنچایا۔
آپریشن کے لیے پولیس نے عوام سے تعاون کی اپیل کی:
پولیس نے اس آپریشن کے لیے عام شہریوں سے بھی تعاون کی اپیل کی تھی۔ لوگوں نے ذمہ داری کا مظاہرہ کرتے ہوئے راستہ خالی کیا اور اس انسانی کام میں تعاون دیا، جس سے پورا آپریشن کامیاب ہو سکا۔ڈاکٹروں کے مطابق، اعضاء کی منتقلی میں وقت پر ڈیلیوری سب سے اہم ہوتی ہے۔ اگر عضو وقت پر نہ پہنچے تو مریض کی جان کو خطرہ ہو سکتا ہے۔ ایسی صورت میں گرین کوریڈور جیسی سہولت زندگی اور موت کے درمیان فرق ثابت ہوتی ہے۔
یہ ٹیم ورک معاشرے میں امید اور اعتماد قائم کرتا ہے: پولیس
پولیس افسران نے اسے ایک کامیاب ٹیم ورک قرار دیاہے ، جس میں ایئرپورٹ اتھارٹی، میڈیکل ٹیم اور ٹریفک پولیس نے مل کر کام کیا۔ انہوں نے کہا کہ اس طرح کے اقدامات معاشرے میں امید اور اعتماد قائم کرتے ہیں۔
