گجرات میں مبینہ طور پر جعلی سرکاری دفاتر قائم کرکے سرکاری فنڈز میں کروڑوں روپے کی خردبرد کا معاملہ سامنے آیا ہے۔ انفورسمنٹ ڈائریکٹوریٹ (ED) کی تحقیقات کے مطابق، مرکزی ملزم سید نے اپنے اہل خانہ، قریبی ساتھیوں اور بعض سرکاری افسران کے ساتھ مبینہ ملی بھگت کرکے 22.7 کروڑ روپے سے زائد کی رقم ہڑپ کی۔
121 سے زائد فرضی منصوبوں کا دعویٰ
تحقیقات میں الزام ہے کہ ملزمان نے سرکاری دفاتر کی طرز پر جعلی دفاتر قائم کیے اور پورے نظام کو حقیقی ظاہر کرنے کی کوشش کی۔ اسی مبینہ نیٹ ورک کے ذریعے 121 سے زائد فرضی ترقیاتی منصوبوں کی منظوری حاصل کی گئی۔ میڈیا رپورٹ مطابق، ان منصوبوں کے نام پر سرکاری خزانے سے رقم جاری کرائی گئی اور بعد میں اسے ملزمان سے منسلک مختلف اکاؤنٹس میں منتقل کیا گیا۔
رقم کہاں استعمال ہوئی؟
ای ڈی کے مطابق، مبینہ طور پر غبن کی گئی رقم کو کئی بینک اکاؤنٹس کے ذریعے منتقل کیا گیا۔ تحقیقات میں یہ بھی سامنے آیا کہ رقم کا ایک حصہ جائیدادوں، شیئرز اور میوچل فنڈز میں سرمایہ کاری کے لیے استعمال کیا گیا۔ ایجنسی اب اس بات کا بھی سراغ لگا رہی ہے کہ اس پورے نیٹ ورک میں کون کون لوگ شامل تھے اور سرکاری رقم جاری کرانے میں کس سطح پر مبینہ مدد فراہم کی گئی۔
سرکاری نظام پر اٹھے سوال
جعلی دفاتر کے ذریعے فرضی منصوبوں کے نام پر کروڑوں روپے جاری ہونے کے دعوے نے سرکاری فنڈز کی نگرانی اور انتظامی نظام پر بھی سوال کھڑے کر دیے ہیں۔ED کی کارروائی ابھی جاری ہے اور ایجنسی مبینہ طور پر متعلقہ بینک اکاؤنٹس، جائیدادوں اور مالی سرمایہ کاری کی تفصیلات کی جانچ کر رہی ہے۔ تاہم، تحقیقات میں سامنے آنے والے الزامات کو عدالت میں ثابت ہونا ابھی باقی ہے۔
