جموں وکشمیر میں بارش کے قہرسے11 افراد ہلاک ہو گئے۔حکام نے بتایا کہ پیر کو جموں بھر میں بارش سے متعلق تازہ واقعات میں ایک خاتون اوراس کے دو بچوں سمیت کم از کم 11 افراد ہلاک ہوئے، جس سے گزشتہ دو دنوں میں مرنے والوں کی تعداد بڑھ کر 23 ہو گئی۔پونچھ اور راجوری کے سیلاب زدہ اضلاع میں مسلسل موسلا دھار بارش کی وجہ سے بچاؤ اور امدادی کاموں میں رکاوٹ کے باعث سات افراد لاپتہ ہو گئے۔حکام نے بتایا کہ پونچھ میں لوران کے بالائی علاقوں میں موسلا دھار بارش سے مٹی کے تودے گرنے سے دو بچوں سمیت سات افراد زندہ دب گئے۔
پونچھ میں بارش کا قہر،لینڈ سلائڈنگ
جموں کشمیر کے ضلع پونچھ کے گاؤں لوران میں شدید بارشوں کے بعد پیش آئے لینڈ سلائیڈنگ نے قہر برپا کر دیا ہے۔لینڈ سلائیڈنگ کے نتیجے میں ایک رہائشی مکان ملبے کا ڈھیر بن گیا اور7 افراد ہلاک ہو گئے۔ اطلاعات کے مطابق لینڈ سلائیڈنگ کے بعد مکان تلے دب جانے والوں میں زاہدہ بیگم، عدنان رفیق، ارضہ، شمیم اختر، تنویر، عرفان اور سالہ صبیحہ شامل ہیں۔ واقعے کی اطلاع ملتے ہی امدادی ٹیموں نے فوری طور پر موقع پر پہنچ کر ریسکیو آپریشن شروع کیا اور ملبے تلے دبے تمام افراد کی لاشیں نکال لیں۔ ضروری قانونی کاروائی کے بعد لاشیں ورثاء کے حوالے کر دی گئی ہیں۔
قومی شاہراہ 244 پرلینڈ سلائیڈنگ
ڈوڈہ ضلع کے راگی نالہ کے قریب قومی شاہراہ 244 پر بڑے پیمانے پر لینڈ سلائیڈنگ کے نتیجے میں دو افراد ہلاک اور پانچ زخمی ہو گئے، جبکہ تین گاڑیوں کو بھی نقصان پہنچا۔زخمیوں کو ابتدائی طبی امداد کے بعد بہتر علاج کے لیے جی ایم سی جموں منتقل کیا گیا، جبکہ حکام نے فوری طور پر ملبہ ہٹانے کا کام شروع کر دیا۔کلیئرنس آپریشن مکمل ہونے کے بعد قومی شاہراہ 244 کو دوبارہ ٹریفک کے لیے کھول دیا گیا اور آمدورفت معمول کے مطابق بحال ہو گئی۔
اسمارٹ سٹی کے دعووں کی قلعی کھل گئی
سرینگر شہر اور گردونواح میں آج ہوئی چند لمحوں کی بارش نے ایک بار پھر سرکار کے شہر کو 'اسمارٹ سٹی' بنانے کے دعووں کی قلعی کھول کر رکھ دی ہے۔ نہ صرف شہرِ خاص بلکہ تاریخی گھنٹہ گھر بھی پانی بھر جانے سے جھیل کا منظر پیش کر رہا تھا۔ شہرِ خاص میں ڈرینیج سسٹم چوک ہونے کے باعث پانی گھروں اور دکانوں میں داخل ہو گیا، جبکہ خانیار اور بابا ڈیمب کے علاقوں میں جے سی بی (JCB) کی مدد سے بنڈ کاٹ کر پانی کی نکاسی کی گئی۔ ادھر محکمہ موسمیات نے 22 جولائی تک موسم اسی طرح رہنے کی پیش گوئی کی ہے۔
ایس ایم سی کمشنر فضل لحسیب کا بیان
سری نگر میونسپل کارپوریشن کے کمشنر، فضل لحسیب نے آج کہا ہے کہ موسلا دھار بارش کے بعد شہر کے نکاسی آب کا نظام متاثر ہوا ہے۔ اس صورتحال کے پیش نظر حکام نے تمام ڈی واٹرنگ اسٹیشنوں کو متحرک کرنے کے ساتھ ساتھ موبائل پمپ اور فیلڈ ٹیمیں تعینات کر دی ہیں تاکہ پانی جمع ہونے کی صورتحال پر قابو پایا جا سکے۔ سری نگر میں میڈیا کے ساتھ بات کرتے ہوئے ایس ایم سی کمشنر نے بتایا کہ شہر میں دو گھنٹے کے دوران اچانک شدید بارش ہوئی، جس کے نتیجے میں کئی نشیبی علاقوں میں پانی جمع ہو گیا ہے۔ انہوں نے مزید کہا کہ بارش شروع ہوتے ہی سٹی ڈرینیج، ایس اینڈ ڈی۔ سکنڈ اور مکینیکل ڈرینیج ڈویژن کی ٹیموں کو فوری طور پر امدادی کاروائیوں پر مامور کر دیا گیا ہے۔
محکمہ موسمیات کی پیش گوئی
محکمہ موسمیات نے آج رات سے کل دوپہر تک مزید موسلا دھار بارش کی پیش گوئی کرتے ہوئے شہریوں کو محتاط رہنے کی ہدایت کی ہے۔ محکمہ کے انچارج ڈائریکٹر ڈاکٹر مختیار احمد نے منصف ٹی وی سے گفتگو کرتے ہوئے خبردار کیا ہے کہ اس دوران پہاڑی علاقوں میں تودے گرنے اور لینڈ سلائیڈنگ کے واقعات پیش آ سکتے ہیں۔ ایگزیکٹو انجینئر جل شکتِی راجوری نے بتایا کہ حالیہ سیلاب کی وجہ سے راجوری میں تقریباً 125 اسکیمیں متاثر ہوئی ہیں اور مزید تفصیلات اب بھی سامنے آ رہی ہیں۔ انہوں نے کہا کہ ہمارے مرد محنت سے پانی کی فراہمی بحال کرنے میں مصروف ہیں اور تب تک ہمارے ٹینک بھی پانی فراہم کر رہے ہیں۔
پانپورمیں سڑک زیرآب،گھروں میں پانی داخل
پانپور کے گالندر پتل باغ علاقے میں بارش کے باعث رابطہ سڑک زیرِ آب آ گئی، جبکہ پانی کئی گھروں میں داخل ہونے سے مقامی لوگوں کو شدید مشکلات کا سامنا کرنا پڑ رہا ہے۔ متاثرین نے حفاظتی بند کی اونچائی بڑھانے کا مطالبہ کیا، جبکہ تحصیلدار پانپور نے علاقے کا دورہ کرکے صورتحال کا جائزہ لیا اور متعلقہ محکموں کو ضروری اقدامات کی ہدایت دی۔
